Күүстээх-уохтаах, төрөл уол оҕо эрдэҕиттэн тустуунан үлүһүйэн туран дьарыктаммыта, оройуоҥҥа буолар тустууларга биири да көтүппэккэ тустара. Улахан уҥуохтаах, кэтит сарыннаах, киппэ көрүҥнээх, киһи быһыытынан туохха да улаханнык долгуйбат, хам-хаадьаа мүчүк эрэ гынар, нүһэр бэйэтэ бокса, тустуу, хары баттаһыыта, ыараханы көтөҕүү эҥин буоллаҕына саҥата-иҥэтэ суох киирэн кыттыбыта эрэ баар буолааччы. Бэйэтэ айылҕаттан илиитэ кытаанах, үчүгэй сүһүөхтээх, сиһигэр да күүстээх, сыыһа-халты туттубат, толкуйдаан тустар буолан мэлдьи ситиһиилэнэрэ. Кыттыбыт тустууларыгар хайаан да чемпионнуур, миэстэлэһэр, оройуон чиэһин республика түһүлгэлэригэр хаста да ситиһиилээхтик көмүскээбит республика биир күүстээх тустууга буолар.

Константин араас үлэҕэ кыайыылаах-хотуулаах, дьону бэйэтин тула түмэр дьоҕурдаах, киһи кыһалҕатын өйдүүр салайааччы быһыытынан дьон-сэргэ билинэллэр, сыаналыыллар.

Константин дэгиттэр спортсмен, көҥүл тустууга уонна боксаҕа СР тыатын сирин II спортивнай оонньууларын III призера буолуталаабыта, 1987 с. Баһылай Манчаары XI спартакиадатыгар 80 кг үөһэ II м ылбыта, 1989 с. көҥүл тустууга П. Пинигин бирииһин иһин Бүтүн Союзтааҕы турнир  уонна Буучугурас бирииһин иһин турнир III призердара,  СГУ аһаҕас чемпионатын II миэстэлээх бөҕөс.

Константин 1990 с. хапсаҕайга Манчаары спартакиадатыгар II миэстэлээх, көҥүл тустууга Н.Н. Тарскай бирииһигэр Саха Республикатын чемпионатын III призера, Бүлүү зонатын чемпиона, Василий Румянцев республикатааҕы турнир II призера.

Кини 1995 с. Василий Румянцев республикатааҕы турнирыгар эмиэ иккис призер буолбута, 2005 с. Ю.С. Андреев ыһыаҕар I м ылан анал бириис туппута, 2006 с. М.И. Васильев бирииһигэр республиканскай турниры кыайбыта.

Константин Иванович Нам нэһилиэгин баһаарынай чааһын начальнигынан үлэлии олорон пенсияҕа тахсыбыта.