Семен оҕо эрдэҕиттэн икки тустуунан дьарыгырбыта. Кинини тустууга ССРС уонна САССР спордун маастара Николай Корякин аан маҥнай дьарыктаабыта. Орто оскуола кэнниттэн СГУ-га зоотехник идэтигэр үөрэнэр кэмигэр элбэхтик хапсаҕайга тустубута. Саха АССР хапсаҕайга чемпионатыгар 1966 с. 64 кг ыйааһыннаахтарга II м ылбыта, онтон салгыы Сибиир норуоттарын Спартакиадатыгар барильдан тустууга ситиһиилээхтик тустубута.

Семен Васильев 1990 с. Степанов В.И.-Буучугурас IV республиканскай турнирыгар 75 кг II м ылбыта, 1991 с. 65 кг чемпионнаабыта. Бу куоталаһыылар түмүктэринэн кини Саха Республикатын хапсаҕай тустууга спордун маастара буолбута.

Семен Константинович өр сылларга И. Барахов аатынан совхоз зоотехнигынан үтүө суобастаахтык үлэлээбитэ.

Семен Константинович кэргэнэ Татьяна Гаврильевналыын үс уол оҕону төрөтөн, иитэн, үлэ-олох үөһүгэр үктэннэрэн улаатыннарбыттара.

Семен Константинович үлэһит, спортсмен быһыытынан элбэх хайҕал, махтал тыллары истибит, Бочуотунай грамоталары, Махтал суруктары туппут сэмэй үлэһит киһи этэ. Үлэ үөһүгэр сылдьан ыар ыарыыттан эдэр сааһыгар олохтон барбыта.