Үөһээ Бүлүү оройуонун Боотулуу нэһилиэгэр төрөөбүтэ, 1-кы №-дээх орто оскуолаҕа үөрэммитэ, СГУ физическэй культураҕа факультетын бүтэрбитэ. Университетка үөрэнэр сылларыгар үөрэҕи, спорду дьүөрэлээн, эдэр саас эрчимин, күүһүн-уоҕун, дьулуурун сөпкө туһанан хапсаҕайга тахсыылаахтык кыттыбыта. Айылҕаттан бэриллибит кыахтаах тустуугу араас күрэхтэһиилэргэ үгүстүк астына көрөр буолбуттара. Үрдүк үөрэххэ үөрэнэр сылларыгар мэлдьи күрэхтэһиилэр графиктарыгар сөп түбэһэн спортивнай форманы тута сылдьар ардыгар кытаанахтардаах буолара. Ол эрэн, Павел Гаврильев 1988 с. Н.К. Докторов-Бычырдаан 75 сааһыгар аналлаах хапсаҕайдаһан тустууга абсолютнай чемпион буолбута.

         Үөрэҕин бүтэрэн, ыал буолан дойдутугар ананан 1-кы №-дээх И. Барахов аатынан орто оскуолатыгар физкультура учууталынан ананан, үлэ үлүскэнигэр төбөтүнэн түспүтэ. Бэйэтэ бу кэмҥэ эдэр ыал аҕата туһугар түбүгэ син элбэх этэ. Ол эрэн улууһун чиэһин улахан түһүлгэлэргэ ситиһиилээхтик көмүскээбитэ.

         Ол курдук, 1988 с. республика тыатын сирин III спортивнай оонньууларын хапсаҕайга чемпиона, Саха АССР чемпионатын III призера буолбута, 1986 с. Буучугурас бирииһин кыайбыта.

         Павел Ильич 2000-2009 сс. улууска спорткомитет председателинэн үлэлээбитэ, ити сылларга күүстээх санаа, күүс-уох кинини күүрээннээх үлэҕэ көҕүлээбитэ, араас таһымнаах республикатааҕы күрэхтэһиилэргэ, ыһыахтарга хапсаҕайдаһан тустуу түһүлгэлэрин тэрийээччинэн, кыттааччынан, арыт судьуйанан мэлдьи ис сүрэҕиттэн үлэлиир киһи буолан мэлдьи хайҕалга сылдьара.

         Павел Ильич тус бэйэтин олоҕор үөрэҕи, үлэни уонна спорду табыгастаахтык дьүөрэлээбит СР физическэй культураҕа уонна спортка туйгуна, хапсаҕайга САССР спордун маастара, көҥүл тустууга ССРС спордун маастарыгар кандидат.