Григорьев Иван Константинович-Моочой Оҥхой нэһилиэгэр 1929 с. ыам ыйын 18 к. күн сирин көрбүтэ. Отой кыра сааһыттан лаппа кыанара биллэн барбыта, бииргэ үөскээбит оҕолорун тустан лаппа баһыйталыыра, нэһилиэгин ыһыахтарыгар тустар буолан барбыта. Оччотооҕу оҕону ким анаан-минээн үөрэтиэ баарай, бэйэтэ араас приемнары бииргэ оонньуур оҕолоругар боруобалаан көрөрө. Кыайыыттан кыайыы аргыстаах спорт бу көрүҥүн улам баһылаан олоҕун устата дьарык гыммыта.

Иван улаатан баран 1948-49 сс. Оҥхойго ыһыахха хапсаҕайга тустан иккис-үһүс миэстэлэри ылаттаабыта.

1949 с. Советскай Армия кэккэтигэр сулууспалыы барбыта, Сахалиҥҥа пограничнай заставаҕа түбэспитэ. Сулууслалыы сылдьан 1950 с. кэриэйдэр национальнай тустууларыгар бастаабыта. Сулууспалыы сылдьан Москваҕа 3 ыйдаах боевой самбо инструкторын курсугар үөрэммитэ, курсун бүтэрэн баран төттөрү Сахалиныгар кэлэн боевой самбоҕа саллааттарга инструктордаабыта.

Армияттан кэлэн баран Якутскайга ИДьМ-гар самбо инструкторынан үлэлээбитэ. Ити кэнниттэн араас үлэлэргэ үлэлээтэр даҕаны Иван Константинович тустуутун бырахпатаҕа. Араас күрэхтэһиилэргэ, ыһыахтарга Үөһээ Бүлүүтүн аатын мэлдьи ааттатара.

Кырдьан, ыалдьан да баран тустуу пропагандиһа этэ, сиэнин Ваняны тустууга сирдээбитэ. Сиэнэ Иван Григорьев билигин туспа суоллаах-иистээх тустуук, хапсаҕайга Саха Республикатын спордун маастара.

Иван Константинович Григорьев тустууга кэккэ ситиһиилэрэ:

1954 с. республикаҕа буолбут хапсаҕайга 3 миэстэ.

1955-56 сс. Якутскайга хапсаҕай тустууга 2 миэстэ.

1957-61сс. хапсаҕайга республика чемпиона.

Бу кэмнэргэ «Динамо» обществоттан туста сылдьыбыта. «Динамо» общество иһинэн буолбут спортивнай самбоҕа 5 сыл субуруччу чемпионнаабыта.

1961 с. Саха АССР спордун маастара буолбута.

1961 с. спортивнай самбоҕа ССРС спордун маастарыгар кандидат буолбута. “Динамо” общество Киин Сэбиэтин күрэхтэһиитигэр Орджоникидзе куоракка спортивнай самбоҕа 3 миэстэ, Баку куоракка көҥүл түстууга 4 миэстэ буолуталаабыта.

1962 с. Махачкала куоракка көҥүл тустууга “Динамо” обществоҕа Киин Сэбиэтигэр бастыыр иһин  күрэхтэһиигэ 3 миэстэ буолбута.

Бу күрэхтэспит куораттарыгар Москваҕа самбоҕа үөрэнэ, эрчиллэ сылдьан тустуталаабыта.

1963 с. Петропавловскай куоракка коряктыы национальнай тустууга чемпион аатын ылбыта.

1964 с. Улан-Удэ куоракка буряттар национальнай тустууларыгар чемпионнаабыта.

Ити курдук, биһиги биир дойдулаахпыт Иван Григорьев улахан спортивнай олоҕу олорбута. Кини тустар дьарыгын сиэнэ Иван Григорьев эрэллээхтик илдьэ иһэр.