Дима Харбалаах нэһилиэгэр 1996 с. төрөөбүтэ. Кыра эрдэҕиттэн тустара. Оскуоланы бүтэрэригэр улууска 70 кг дылы улахан да дьоҥҥо кыайтарбат буолбута. Илиитигэр уонна сиһигэр күүстээх буолан үөһэ көтөҕөн таһааран охтортуур.

         Дима 3 кылаастан 6 кылааска дылы Үөһээ Бүлүүгэ оҕо спортивнай оскуолатыгар тустууга эрчиллэр, кинини Степан Жендринскэй уонна Владимир Литвинов дьарыктыыллар. Салгыы Нам улууһугар Кирилл Павлов, Чердонов дьарыктыыллар, 9-10 кылаастарга Олимпийскай эрэл училищетыгар эрчиллэр. Онон Дима тустуу оскуолатын ааспыт бөҕөс. Ордук табыллан хапсаҕай тустууга тустар. 17 саастааҕар Үөһээ Бүлүү ыһыаҕар 70 кг дылы убайдарын охтортоон I м ылбыта. Финалга Рустам Прокопьевы охторон дьону соһуппута. Онтон абсолютнай тустууга киирсии буолбутугар эмиэ финалга дылы барыларын кыайан тиийбитэ уонна иккиһин Рустамы кытта тустан охтон II м ылбыта. 70 кг убайдарын солбуйууһук диэн дьон кэпсэппитэ да, 70 кг ыйааһына элбээн, 80 кг көспүтэ.

         Республика маастар нуормалаах турнирдарыгар кэлин маннык туһунна: 2015 с. Григорий Попов бирииһигэр II м; 2015 с. “Хаҥалас хапсаҕайыгар” II м; 2015 с. Н.К. Докторов-Бычырдаан бирииһигэр II м; 2016 с. Буучугурас бирииһигэр чемпион буолар; 2015 с. Хаҥаласка Виктор Михайлов бирииһигэр чемпион; 2016 с. Хаҥаласка Виктор Михайлов бирииһигэр II м ылар. Бу турнирдар түмүктэринэн Саха Республикатын спордун маастара буолар.

         Дима үс төгүл республика чемпионаттарыгар кытынна. 2015 с. Хороҕо дьоһуннаахтык тустан элбэх күүстээх бөҕөстөрү охторон соһуталаабыта. 2016 с. үчүгэйдик тустубута эрээри, бириистээх миэстэҕэ киирбэтэҕэ.

         2015 с. түмүгүнэн Саха сирин эдэрдэригэр үчүгэйдик тустан, Россия чиэһин көмүскүү кумахха тустууга кытта Румынияҕа 20 сааһыгар дылы саастаахтарга тиийбитэ. Дима бу чемпионатка түөртэ тустан барыларын хотон эдэрдэргэ Аан дойду кумахха тустууга чемпиона буолбута.