Саха киһитигэр киһи астына, аҥардастыы көрөр киһитэ этэ. Уҥуоҕунан улахана саһаан үрдүктээх, модьу-таҕа, күүстээх-уохтаах, чиэппэр күүстээххэ күтүрэнэр бөҕө киһи. Алданынан, Бодойбонон, айаҥҥа бэдэрээт көтөҕүүтүгэр сүрүн киһилэрэ кини эбит.

         20-с сылларга хапсаҕайдаһан тустууга, оччолорго кулгаах тааска тыаһатыылаах хабыр тустууга Бүлүү эҥээригэр аҥардастыы сылдьыбыт. Киһиттэн атаҕастамматах, охтубатах да эбит.

         Кыаҕын иһинэн санаабыт утарсааччытыгар арыт үөһэ өттүн сыгынньахтаммакка түһүлгэҕэ киирэрэ үһү. “Хаһан уһуннук тустаары” — диэн.

         Көтөҕөр, сүгэр күүһэ бэрт буолан киһиэхэ икки хонноҕор иккилии өттүгэр түөртүү  тарбаҕын  укта да, үөһэнэн быраҕар идэлээҕэ – диэн сэһэргииллэр. Бырахпыт кыаҕар эрэнэн кэннин хайыспакка да эрэ түһүлгэттэн тахсара үһү.

         Дьоһуннаах, сөҥ куоластаах дьуохар этээччи, ол быыһыгар тустар дэгиттэр талааннаах эбит. Аҕа дойду Улуу сэриитин кыттыылааҕа. Колхоз кэмигэр председатель, ферма сэбиэдиссэйэ курдук үлэлэргэ салалтаҕа үлэлээбит. Эдэригэр сүрдээх мааны, чэбэр киһи эбит. Быраата Буучугурас тустан эрэр кэмигэр түһүлгэтин түмүктээбит. “Оҕом иннин быһа түспэппин” — диэн. Буучугурас кыайан тахсыбытын көрө олорон: “Солбук баар” — диэн баран олгуобуйа  курдук харыларынан салгыны сутурҕалаабыта уос номоҕор сылдьар. Буучугурас 1941 сыл сэриигэ барарыгар оройуоҥҥа киирэн атаарсыбыт, эргийиэ суоҕун билбиттии улаханнык уйадыйбыта үһү. Үөһээ Бүлүү улууһун биир айылҕаттан айдарыылаах сүдү бөҕөһө Донской Никита Гаврильевич-Бөҕө Бөтөҕө аата-суола, күүһэ-күдэҕэ көлүөнэттэн көлүөнэҕэ кэпсэнэ туруохтаах.