Егор Иванов СР 2016 с. хапсаҕай тустууга чемпиона, 2013 с. Азия континенын кыайыылааҕа, 2013 с. Манчаары Спартакиадатын II м призера. Егорга бу ситиһиилэр, ону таһынан республиканскай турнирдары кыайыыта элбэх сыранан кэлбиттэрэ. Ол курдук 2007 с. Яков Егоров 50 сааһыгар анаммыт турнирга Кырыкый нэһилиэгэр 16-17 сааһыгар улахан дьоҥҥо аан маҥнай күүһүн боруобаламмыта, 55 кг ыйааһыннаахтарга II м ылбыта. Онтон сотору буолаат Нам нэһилиэгэр спорт маастара Денис Кривошапкин кэриэһигэр тэриллибит эдэрдэр ортолоругар республикатааҕы турниры кыайбыта уонна хапсаҕай тустуунан тахсыылаахтык тустан барбыта.

         Гоша 1990 с. ахсынньы ыйга Үөһээ Бүлүү улууһун Дүллүкү нэһилиэгэр төрөөбүтэ. Аҕата Егор Петрович Иванов Мэйиктэн төрүттээх, эмиэ спордунан өр сылларга ситиһиилээхтик дьарыктаммыт, мас тардыһыытыгар Саха АССР спордун маастара, Саха АССР чемпиона, Манчаары Спартакиадатын чемпиона, гиирэ анньыытыгар улуус күүстээх спортсмена, билигин да күүһүн-уоҕун ыһыктабакка сылдьар бөҕө киһи. Гоша эһэтэ Петр Васильев Мэйик киһитэ этэ. Эдэригэр да, сааһыран да баран улуус иһигэр тустара, хотторбот бөҕөс этэ. Ордук айылҕа бэлэхтээбит күүһүнэн тустара.

         Егор Иванов аан маҥнай П.Е. Алексеев бирииһигэр 19 саастааҕар тустубута, 75 бөҕөс кыттыбыт 62 кг ыйааһыннаахтарга 7 м ылан үөрдүбүтэ, бу оҕо киһиэхэ үчүгэй ситиһии этэ. Онтон субуруччу биэс сыл тустан бириистээх миэстэҕэ киирбэтэҕэ, саха бэртэрэ Гошаны күүскэ экзаменныыллара. Кини ыйааһыныгар республика күүстээхтэрэ А. Львов (Сунтаар), К. Бурнашев (Уус-Алдан), Нь. Егоров (Хаҥалас), А. Павлов (Чурапчы), Нь. Бугулов (Дьокуускай), Дм. Ушницкай (Бүлүү), П. Сивцев (Нам), С. Навконов (Үөһээ Бүлүү), С. Тимофеев (Үөһээ Бүлүү) уо.д.а. тусталлара. Бу аатырбыт бөҕөстөрү тоҕо көтөн тахсарга уустук этэ. Бу бөҕөстөр солбуһа сылдьан бастыыллара. Ол эрэн Гоша элбэхтик эрчиллэн, күүс-уох эбинэн, ситэн-хотон 2015 с. кыл-мүччү бастаабатаҕа, 2016 с. Дьокуускай куоракка кими да тулуппатаҕа, финалга Сунтаар ааттааҕа субуруччу 5 сыл чемпионат пьедесталыттан түспэтэх, ити сыл республика чемпиона буолбут А. Львову холкутук кыайан сэттэ сыл устата дьулуспут баҕатын толорбута.

         Егор Иванов илиитигэр күүстээх, атаҕар үчүгэйдик турар, сыыһа-халты туттубат бөҕөс. Ол эрэн сорох түгэннэргэ хотторон хомотор, ол курдук 2015 с. Монголия чемпионатыгар бириистээх миэстэҕэ киирбэтэҕэ. Егор Иванов Уус-Алдаҥҥа тустуу оскуолатыгар дьарыктаммыта. Онтон кэлэн Дүллүкүгэ И. Мордовскойга эрчиллибитэ. Онон тустуу оскуолатын балайда ааспыт бөҕөс. Бүлүүгэ педколледжка үөрэнэр кэмигэр элбэхтик эрчиллибитэ. Егор син атын тустууктар курдук элбэхтик эрчиллэр, албастарын чочуйар, байытар. Күүстээх бөҕөс буоларга сыаллаах-соруктаах эрчиллэр сырата таах хаалбата. Ситиһиилэр кэллилэр, сааһа лоп бааччы тустар кэмэ буолла, 26 саас хапсаҕайга тустарга саамай сөптөөх саас буолар. Егор 2016 с. республика чемпиона буолан, 62 кг ыйааһыннаах бөҕөстөргө Саха сирин уонна Үөһээ Бүлүү улууһун 1-кы №-дээх бөҕөһүнэн буолар. Бу улахан эппиэтинэс буоларын Егор Иванов өйдүүр, ол иһин салгыы сыралаахтык эрчиллэр.

         Егор Иванов сүрүннээн туттар албастара: умса тардыы, аҥар атахха киирэн охторуу, умса тэбии, атах ис-тас өттүнэн таһыйыы, кэлиҥҥи тустууларын көрдөххө икки атахха киирэн көтөҕөр буолбут. Егор Иванов туста барарыгар төрөөбүт Дүллүкүтүн нэһилиэгин дьаһалтата үп булан көмөлөһөр, онон бөҕөс элбэх сылларга Дүллүкү аатыттан тустар. СР спордун маастара Егор Иванов бу кэмҥэ үөрэҕин бүтэрэн Үөһээ Бүлүүгэ оҕо дьиэтигэр үлэлиир. Егор Егорович бу кэмҥэ улуус спортивнай чиэһин ситиһиилээхтик көмүскүүр баҕалаах эрчиллэ, бэлэмнэнэ сылдьар уонна эдэр киһи сиэринэн үлэлии-үлэлии үөрэҕин үрдэтинэр.