Егоров Анатолий Иванович 1946 с. Аһыкай сиригэр Сайылыкка төрөөбүтэ. Ийэтэ Егорова Мария Осиповна бэйэтин кэмигэр салайар үлэҕэ сылдьыбыта. Сэрии аас-туор сылларыгар сельсовет председателинэн үлэлээбит.

Анатолий 1953 с. Онхой оскуолатыгар үөрэнэ киирбитэ. Начальнай кылаастары ситиһиилээхтик бүтэрэн баран салгыы Далыр, Хоро, Үөһээ Бүлүү оскуолаларыгар үөрэнэн ситии-хотуу аттестатын ылбыта. Орто оскуола кэнниттэн Ньурба Маарыгар 3 №-дээх СПТУ-ну бүтэрэн тракторист идэтин ылбыта. Оҥхойго кэлэн колхозка үлэтин саҕалаабыта.

1966 с. саас Якутскай Мархатыгар бригадирдар курстарыгар ыыппыттара. Ону бүтэрэн кэлэн Аһыкай бригадатыгар биригэдьиирдээбитэ. 1968 с. «Үөһээ Бүлүү» совхозка спорт инструкторынан анаммыта. Оҕо эрдэҕиттэн спордунан дьарыктаммыт буолан олус санаата кэлэн үлэлээбитэ.

Спортивнай ситиһиилэринэн оройуоҥҥа 1963-1968 сс. ыйааһыныгар хапсаҕайга, көҥүл тустууга бастаталаабыта. Бүлүү зонатыгар элбэх бириистээх миэстэлэри ылаттаабыта. 1967 с. юбилейнай ыһыахха оройуоҥҥа абсолютнай чемпион аатын ылбыта.

1969 с. Бүлүү Тааһаҕарыгар көһөн салайар үлэҕэ сылдьыбыта. Араас күрэхтэһиилэргэ кыттара, судьуйалаан да ылара. 1986 с. төрөөбүт түөлбэтигэр көһөн кэлбитэ. Совхозка директоры солбуйааччыттан саҕалаан үлэлээн киирэн барбыта.

1994 с. Саха АССР хапсаҕайдаһан тустууга бастакы абсолютнай чемпиона Степанов В.И.-Буучугурас республиканскай турнирыгар Мэйик нэһилиэгэр ветераннарга соргулаахтык тустан чемпион аатын ылбыта, маастар нуорматын толорбута.

Анатолий Иванович кэргэнинээн Маргарита Иннокентьевналыын 4 оҕолоохтор, элбэх сиэннээхтэр. Аҕаларын, эһэлэрин спортивнай олоҕун салгыахтара диэн эрэнэ кэтэһэбит.