Николай Александрович 1985 с. балаҕан ыйын 21 к. Ороһу нэһилиэгэр төрөөбүтэ. Николай олох кыра эрдэҕиттэн тустуунан дьарыктаммыта, маҥнайгы тренерэ И.Г. Кысылбаиков. Николай тыыппалааҕын иһин Үөһээ Бүлүүтээҕи оҕо спортивнай оскуолатыгар киллэрэн көҥүл тустуунан дьарыктаабыттара, кинини Россия спордун маастара В.В. Литвинов эрчийбитэ. Николай Исидор Барахов аатынан орто оскуоланы ситиһиилээхтик үөрэнэн бүтэрбитэ уонна Чурапчытааҕы физкультурнай институтка  үөрэнэ киирбитэ. Институтка үөрэнэр сылларыгар Николай биллиилээх тренер Кирилл Захаровка салгыы эрчиллибитэ.

         Николай хапсаҕайга ордук күүскэ тустар. Ол курдук Чурапчытааҕы институтка үөрэнэр сылларыгар Бөҕө Тараҕай бирииһигэр, Ноговицыннар турнирдарыгар миэстэлэһэр бөҕөс буолбута. Николай 2006 с. институту бүтэрэн дойдутугар кэлэн хапсаҕайга тахсыылаахтык тустан барбыта, Бүлүүгэ 2003 с. Василий Румянцев бирииһигэр 55 кг III м ылбыта, эһиилигэр Буучугурас бирииһигэр 55 кг кыайбыта, 2004 с. М. Эверстов бирииһигэр чемпионнуур, 2005 с. В.И. Степанов-Буучугурас бирииһигэр I м ылар, 2008 с. Н.К. Докторов-Бычырдаан бирииһигэр чемпион буолар. 2010 с. П.Е. Алексеев бирииһигэр 55 кг кыайан республика чемпиона буолар. Бу тустууга финалга Саха сирин биир бастыҥ хапсаҕайдьытын, Үөһээ Бүлүү бөҕөһө Семен Тимофеевы охторбута.

         Николай Егоров Үөһээ Бүлүү улууһун хапсаҕайын этигэр-хааныгар иҥэриммит бөҕөс, эмиэ дьиҥ сахалыы хамсаныылардаах, түргэн тустуулаах бөҕөс. Атахха үчүгэйдик киирэр, киирдэҕинэ төлө туппат, тустууну баһылаан-көһүлээн ыытар, чуолкай тустуулаах маастар.