Саха аатырбыт күүстээҕэ, биир биллиилээх хапсаҕайдьыта Егоров Петр Егорович 1927 с. Үөһээ Бүлүү оройуонугар Нам нэһилиэгэр Мутуукаптар диэн күүстээх-уохтаах дьоннордоох аҕа ууһугар төрөөбүтэ.

         Бүөтүр оҕо эрдэҕиттэн тэҥнээхтэриттэн лаппа үрдүк, күүстээх көрүҥнээх буола улааппыт, оҕо эрдэҕиттэн хара үлэҕэ улахан дьону кытта тэҥҥэ үлэлэһэрэ эбитэ үһү. Оччотооҕу кэмҥэ Намҥа оройуон ыһыахтарыгар бастакы бириискэ тустар А.Н. Егоров-Бурҕаа, Докторов Н.К.-Бычырдаан эҥин курдуктары Бүөтүр кыра сылдьан тусталларын көрүтэлиир эбит. Тустууга холоһон көрүөх санаата батарбакка 16-17 саастааҕыттан ыһыахтарга бастыҥ хапсаҕайдьыттары кытта холоһон көрөрө үһү. Онтон буутун этэ буһан, холун этэ хойдон барыыта элбэхтик тустан, бэйэтин күүһүгэр, үрдүк уҥуоҕар, үскэл этигэр-сиинигэр сөп түбэһэр албастары баһылаан Саха АССР чемпионаттарыгар иккитэ бастаабыта, 1973 с. Манчаары Баһылай Спартакиадатыгар кыайбыта.

         Петр Егорович үйэтин тухары орто сүһүөх салайар үлэҕэ үлэлээбитэ. Бурдук үүннэриитинэн аатырбыт Нам нэһилиэгин “Чолбон” холкуос биригэдьииринэн, солбуйааччы председателинэн, Нам совхоз-рабкооп председателинэн таһаарыылаахтык үлэлээбитэ.