Дмитрий Степанович 1940 с. ахсынньы 24 к. Верхоянскай оройуонун Дулҕалаах нэһилиэгэр төрөөбүтэ. 1961 с. Советскай Армия кэккэтигэр ытык иэһин толоро ыҥырыллыбыта. Сулууспатын Уральскай байыаннай уокурукка саҕалаабыта, туйгун сулууспатын иһин икки төгүл полк Знамятын иннигэр хаартыскаҕа түһэр үрдүк чиэскэ тиксибитэ. Уральскай байыаннай уокурук самбоҕа, көҥүл тустууга чемпиона буолуталаабыта уонна ити көрүҥнэргэ маастарга кандидат нуорматын толорбута.

         Сулууспатын кэннэ Баатаҕайга спорткомитетка инструкторынан үлэлээн баран, Магадан пединститутун физмат отделениетыгар үөрэнэ киирбитэ. Үөрэнэр сылларыгар Магадан уобалаһын самбоҕа, көҥүл тустууга хас да төгүллээх чемпиона буолбута.

         1968 с. Үөһээ Бүлүүгэ кэлэн киэһээҥи оскуолаҕа математика учууталынан үлэтин саҕалаабыта.

         1969 с. “Урожай” спортобщество председателинэн талыллан 1969-1972 сс. үлэлээбитэ. Онтон райпотребсоюз систематыгар көһөн үлэтин экспедиторынан саҕалаабыта, кэлин ыскылаат сэбиэдиссэйинэн, завхоһунан, товароведынан, гараж сэбиэдиссэйинэн ситиһиилээхтик үлэлээбитэ.

         Дмитрий Степанович 1995 с. “За добросовестный труд в потребительской кооперации России” диэн знагынан наҕараадаламмыта.

         Дмитрий 1992 с. хапсаҕайга Саха АССР спордун маастарын нуорматын толорбута. Кини спортка ситиһиилэрин иһин физкультурнай хамсааһын 75 сыллаах үбүлүөйүнэн сибээстээн, Правительство “Спортка, физкультураҕа үтүөлэрин иһин” диэн түөскэ кэтиллэр знактарынан, дипломунан, сыаналаах бэлэхтэринэн наҕараадаламмыта.

         Дмитрий Степанович хапсаҕайдаһан тустууга 1984 с. Буучугурас бирииһигэр ветераннарга 70 кг, 1985 с. Буучугурас бирииһигэр ветераннарга 70 кг, 1991 с. Н.К. Докторов-Бычырдаан бирииһин иһин 75 кг кыайталаабыта, 1993 с. Н.К. Докторов-Бычырдаан бирииһин иһин аһаҕас турнирга 75 кг иккис миэстэни ылбыта. 1994 с. Үөһээ Бүлүү оройуонугар Буучугурас бирииһигэр ветераннарга 70 кг кыайыылааҕа буолбута.