Степан 1967 с. Үөһээ Бүлүү оройуонун Балаҕаннаах нэһилиэгэр төрөөбүтэ. Красноярскай куоракка пединституту үөрэнэн бүтэрбитэ. Үөрэҕин бүтэрэн баран маҥнай Далыр оскуолатыгар физкультура учууталынан үлэлээбитэ. 1996 сылтан 1997 сылга дылы оҕо спортивнай оскуолатыгар көҥүл тустууга сүрүн тренеринэн үлэлээбитэ. Кини дьарыктаабыт оҕолоро Платон Саввинов, Ян Михайлов, Увар Тимофеев көҥүл тустууга РФ спордун маастара буолбуттара. Увар көҥүл тустууга ыарахан ыйааһыҥҥа Россия оҕолорго чемпиона буолбута. Анисимов Айаал Федеральнай уокурук чемпионнарынан буолбуттара.

Степан бэйэтэ көҥүл тустууга ССРС спордун маастарыгар кандидат, ону таһынан СР спордун хапсаҕайга маастара. Степан Жендринскэй Үөһээ Бүлүү улууһун, Бычырдаан, Буучугурас, онтон да атын республиканскай турнирдар чемпионнара, призердара.

1995 с. Баһылай Манчаары XIV Спартакиадатыгар 55 кг III м, 1997 с. Манчаары Баһылай XV Спартакиадатыгар 55 кг II м ылбыта, 2007 с. ыытыллыбыт Федерация Кубогар ветераннарга 60 кг дылы тустан Кубок хаһаайына буолбута,  2009 с. эмиэ Кубок кыайыылааҕа буолбута.

Степан Алексеевич мээнэ түһүөлээн, сыыһа-халты тустубат бөҕөс, барытын көрөн-истэн, толкуйдаан киирсэн тустуутун кыайыыга тиэрдэр былааннаахтык тустара. Үчүгэйдик чочуллубут, хотууга тиэрдэр албастардааҕа, үчүгэйдик атахха киирэрэ уонна таба тутан ыллаҕына мэлдьи хотуулаах тахсара, умса тардара, түргэннээн да кэбиһиэн сөптөөҕө. Степан саха хапсаҕайын дэгиттэр баһылаабыт бөҕөс.

Степан Алексеевич өр сыллаах үлэтэ Үөрэх Министерствотын элбэх грамоталарынан, үөрэх управлениетын, улуус баһылыгын махтал суруктарынан бэлиэтэммитэ, ону таһынан СР физическэй культураҕа туйгуна, СР үөрэҕириитин туйгуна знактардаах.