Клавдий Семенович 1952 с. сэтинньи 7 к. Өргүөт нэһилиэгэр колхозтаах дьиэ кэргэнигэр төрөөбүтэ.

         1960-1969 сс. Тойоку, 1969-1970 сс. Нам, 1970-1972 сс. Чурапчы оскуолаларыгар үөрэммитэ. Чурапчыга үөрэнэ сылдьан, 18 саастааҕар, 1971 с. бүтүн республика үрдүнэн ыытыллар Манчаары Спартакиадатыгар 70 кг ыйааһыҥҥа улахан дьоҥҥо иккис миэстэҕэ тахсыбыта, 1978 с. Саха АССР норуоттарын Спартакиадатыгар иккис миэстэ буолан төрөөбүт Үөһээ Бүлүүтүн хамаандата бастыырыгар кыаҕы биэрбитэ, 1985 с. Бүлүү куоракка ыытыллыбыт Манчаары Спартакиадатыгар иккис миэстэлэммитэ.

         Хапсаҕайдаһан тустууга Клавдий Захаров Үөһээ Бүлүү ыһыаҕын 8 төгүллээх, Буучугурас бирииһин иһин күрэхтэһии 3 төгүллээх (1974-1978 сс.) чемпиона буолбута,  хапсаҕайга Бүлүү зонатын 2 төгүллээх чемпиона буолары ситиспитэ.

         1983 с. Үөһээ Бүлүүгэ П. Пинигин кубогар абсолютнай чемпион буолан Саха АССР спордун маастарын аатын ылбыта. Клавдий көҥүл тустууга ССРС спордун маастарыгар кандидат этэ, 1971 с. Казахстан Усть-Каменегорскай куоратыгар ыытыллыбыт Бүтүн Союзтааҕы турнирга 68 кг төрдүс миэстэлэммитэ, 1972 с. эдэрдэргэ РСФСР “Урожай” обществотын күрэхтэһиитигэр бастаабыта, ССРС тыа сиринээҕи эдэр тустууктарын чемпионатыгар эмиэ иккис миэстэҕэ тахсыбыта, 1973 с. Кемерово, Дьокуускай куораттарга ыытыллыбыт Бүтүн Союзтааҕы турнирдарга төрдүс, бэһис миэстэлэргэ тиксибитэ, 1974 с. көҥүл тустууга Дальнай Восток профсоюзтарын күрэхтэһиитигэр Дьокуускай куоракка чемпион аатын ылбыта, Хабаровскайга ыытыллыбыт итинник күрэхтэһиигэ 74 кг Уһук Илин зонатын үһүс призерунан буолбута, 1975 с. Үөһээ Бүлүүгэ ыытыллыбыт көҥүл тустууга Бүлүү зонатын күрэхтэһиитигэр чаҕылхайдык бастаабыта,  1973 с. саҕалаан, көҥүл тустууга Бүлүү зонатыгар 68-74 кг ыйааһыннарга элбэхтик иккис-үһүс миэстэлэргэ тиксибитэ.

         Клавдий буряттыы тустууга 1978 с. Уһук Илин зонатыгар 80 кг үһүс миэстэлэнэн дэгиттэр талааннааҕын көрдөрбүтэ. Кинини аҥардас тустууну эрэ батан сылдьыбыт дии саныыр алҕас буолуоҕа. Кини Чурапчыттан ураты ханна даҕаны аналлаах, киэҥ-куоҥ спортсаалларга эрчиллибэтэх киһи. Эрчиллэр ханнык да усулуобуйата, бириэмэтэ суоҕун үрдүнэн, сүрэҕин дьулуурунан оройуонун чиэһин өр сылларга ситиһиилээхтик көмүскээбитэ. Клавдий трактористыы сылдьан түһүлгэҕэ элбэхтик тахсыбытын, кыайбытын дьон билэр, умнубат, үрдүктүк сыаналыыр.

         Клавдий 1975 с. стахановскай хамсааһын 40 сыла туолуутун көрсө тэнийбит үлэ ударнай вахтатыгар киирсэн К. Захаров сайын устата 80 га сири илии хотуурунан охсон оройуоҥҥа, республикаҕа бастаабыта, 1987-1993 сс. “Өргүөт” совхозка лугомелиоративнай этэрээт салайааччытынан үлэлээбитэ. Бу алта сыл устата 620 гектар ходуһа, 200 гектар бааһына сирин Клавдий Семенович звенота туһаҕа таһаарбыта.

         Кэнники сылларга кини бааһынай хаһаайыстыба тэринэн үлэлээбитэ. Уолаттарын үлэни таптыырга, кырдьаҕастары убаастыырга үөрэппитэ, үөрэхтээх, үчүгэй үлэһит дьон буолалларыгар кыһамньытын уурбута.

         К.С. Захаров төрөөбүт-үөскээбит Өргүөтүн нэһилиэгэ, Үөһээ Бүлүүтүн улууһа сайдарын туһугар күнүстэри-түүннэри түбүгүрбүт, элбэх көлөһүнүн тохпут үтүөкэннээх механизатор уонна спортсмен буолар.