Тихон Иванов оҕо эрдэҕиттэн төрөл, модьуруох, улаатыах көрүҥнээх этэ. Онон төһө да сааһа кыратын иһин, бэйэтиттэн улахан оҕолору кытта тустара. Ситэн-хотон баран 80-90 кг тустар. Кини Тамалакаан нэһилиэгэр 1993 с. тохсунньу 24 к. төрөөбүтэ. Оскуолаҕа үөрэнэр кэмигэр П.В. Уйгуровка, Е.И. Терентьевка эрчиллибитэ. Сүрүннээн хапсаҕай тустуунан дьарыктаммыта. 2011 с. университетка үөрэнэ киирбитэ уонна 2015 с. үөрэнэн бүтэрбитэ. Армияҕа сулууспалаабыта. Тихон оскуолаҕа да сылдьан син тустара. Күүстээх Ильин бирииһигэр, оройуон күрэхтэһиитигэр миэстэлэһэрэ, бастыыра. Бастакы улахан ситиһиитинэн улахан дьоҥҥо 2010 с. 17 саастааҕар Сунтаарга В.Д. Федотов бирииһигэр III м ылбыта буолар, онтон салгыы 2011 с. Илья Кондратьев бирииһигэр II м ылар. 2013 с. Баһылай Манчаары спорт национальнай көрүҥнэрин сайыннарар киин турнирыгар кыайар. 2013 с. университет аһаҕас турнирыгар эдэрдэргэ 80 кг ыйааһыннаахтарга I м ылар уонна СР эдэрдэргэ абсолютнай кыайыылааҕынан буолар. Бу күрэхтэһиилэр түмүктэринэн СР спордун маастарын нуорматын толорбута, 2014 с. В. Андросов бирииһигэр II м ылбыта.

Тихон көҥүл тустуунан эмиэ дьарыктанара. Ол курдук, университет профессордара Н.К. Алексеев, Н.А. Гоголев, А.И. Иванов бириистэригэр 2012 с. I м ылбыта. Ити сыл үтүөлээх учуутал, үтүөлээх тренер К.С. Постников бирииһигэр II м ылбыта, көҥүл тустууга. 2014 с. Монголия аһаҕас чемпионатыгар II м ылар. Маны таһынан Тихон өссө да элбэх күрэхтэһиилэргэ бастаабыта, миэстэлэспитэ.