Сергей Игнатьев 1970 с. Ньурба оройуонугар Ньурбачааҥҥа төрөөбүтэ. Эдэригэр көҥүл тустуунан дьарыктаммыта, ортотук тустара, күүс-уох элбэх да, албас аҕыйах буолара.

         35 сааһыгар Үөһээ Бүлүүгэ олохсуйа кэлэр, 4-5 сыл ортотук тустар. Хапсаҕайга ситиһиитэ орто этэ, хапсаҕайга сыстаҕаһа суох да  курдуга. Сергей 2010 с. ветераннарга тахсар уонна эмиэ тустан көрөр да, И. Мордовской, М. Бочетов охтороллор. Онтон 2013 с. Федерация Кубогын тустуутугар улуус хамаандатыгар киирэн тустар уонна биэстэ тустан 4 хотуулаах тустууну түмүктүүр.  Итинтэн салгыы Сергей тустууга тахсан 2014 с. П. Алексеев бирииһигэр 70 кг ветераннарга II м ылар, иннигэр Мэҥэ ааттааҕа Алексей Варламов тахсар, 2015 с. чемпионат Хороҕо буолар, бу тустууга Сергей III м ылар, иннигэр Н. Варламов, С. Павлов (Сунтаар) тахсаллар, 2016 с. Дьокуускайга Сергей II м ылар, кини Василий Уйгуровка эрэ хотторор, онтон Федерация Кубогар 4 төгүл субуруччу кыттар, 2014 с. Сергей Кубокка эмиэ соргулаахтык тустар, күрэхтэһиини эмиэ биир хотторуулаах эрэ түмүктүүр. Сергей 2015, 2016 сс. эмиэ ситиһиилээхтик тустар, республика араас турнирдарыгар: Бычырдаан, Буучугурас, “Хаҥалас хапсаҕайа”, Р. Цыпандин, С. Ли-Фу онтон да атын бириистэргэ бириистээх миэстэлэри ылаттыыр. Сергей Үөһээ Бүлүүгэ кэлэн хапсаҕайга үчүгэйдик тустар буолла, ону кини: “Манна күрэхтэһии элбэх, турнирдарга элбэхтик тустабыт, хапсаҕайы салалта да, дьон-сэргэ да кэрэхсиир, онон куруук эрчиллэ, бэлэмнэнэ сылдьаҕын, арай саас элбээн эрэр уонна мин тустар 70 кг ыйааһыммар күүстээх бөҕөстөр элбэхтэр” — диэн этэр. Бу кыайыылаах тустуулара түмүллэн “Сахаада-спорт” хапсаҕайга маастарын 8-с №-дээх дастабырыанньатын, түөскэ кэтиллэр знагын 2016 с. И.А. Халдеев хапсаҕайга ыһыаҕар саха хапсаҕайын салайааччыта А.Е. Мостахов туттарбыта.