1958 с. Үөһээ Бүлүү оройуонун Нам нэһилиэгэр күүстээх-уохтаах, тустуук И.В. Кардашевскай дьиэ кэргэнигэр иккис уолунан төрөөбүтэ. Кини үрдүк үөрэхтээх, тыа хаһаайыстыбатын институтун Красноярскай куоракка үөрэнэн бүтэрбитэ.

Оскуолаҕа үөрэнэр кэмигэр Чурапчыга, улуу тренер Д. Коркин тустууга оскуолатыгар эрчиллибитэ. Красноярскайга салгыы эрчиллэн маастарга кандидат буолбута, үөрэҕин бүтэрэн кэлээт, сотору буолаат Н. Тарскай бирииһигэр көҥүл тустууга Саха АССР чемпионатыгар II м ылбыта, Бүлүү зонатын чемпиона, призера буолбута. 1984 с. хапсаҕайга П.П. Пинигин кубогын иһин 80 кг ыйааһыннаахтарга чемпионнаабыта, Буучугурас бирииһин чемпиона уонна муҥутуур кыайыылааҕа буолбута. Оройуон ыһыаҕар хапсаҕайга өрүү бастыыра. Александр 1985 с. Манчаары Баһылай X Спартакиадатыгар 70 кг ыйааһыннаахтарга уонна 1987 с. XI Спартакиадаҕа 80 кг тустан, 1990 с. Бэрдьигэстээххэ XII Спартакиадаҕа 80 кг иккис миэстэлэри ылаттаабыта.

Александр Кардашевскай 1987 с. хапсаҕайга Саха АССР чемпионатыгар призердаабыта, өссө 1986 с. барильдан тустууга Дальнай Восток уонна Сибиир норуоттарын Спартакиадатын призерунан, Саха АССР норуоттарын Х спартакиадатын III призерунан буолбута. 1987 с. Саха АССР чемпионатыгар эмиэ миэстэлэһэр. Сааһыран баран 2011 с. П.Е. Алексеев бирииһигэр ветераннарга ыарахан ыйааһыҥҥа III м ылар,  маны таһынан Федерация Кубогын 2007, 2009 сс. хаһаайына буолар.

Ити курдук Александр Кардашевскай өр сылларга Саха сиригэр сорунуулаахтык хапсаҕайдаста. Александр илиитигэр, атаҕар күүстээх буолан төҥкөйбөккө эрэ тустара, атаҕыттан ылалларыттан куттаммат буолара уонна сүгүн-саҕын биэрбэт да этэ. Хапсаҕай албастарын толору баһылаабыт бөҕөс быһыытынан сыаналанар.