Николай Титович Григорьев икки өттүттэн күүстээх удьуордартан төрүттээх. Ийэтэ Христина Игнатьевна Поскачина кыыс сылдьан дьахталлар тустууларыгар иннин кимиэхэ да биэрбэтэҕэ. Аҕата Тит Данилович Григорьев 1920 с. төрүөх, сэриигэ 1944 с. ыҥырыллыбыт, 1950 с. эргиллибит. Забайкальскай фроҥҥа 275 с.д. 384 с.т. дьоппуоннары кытта сэриилэспит, ытык иэһин толору төлөөн төрөөбүт алааһыгар төннөн, сэрии кэмигэр айгыраабыт колхоһун олоҕун сөргүтүүгэ биригэдьииринэн үлэлээбитинэн барбыт уонна пенсияҕа тахсыар диэри биригэдьииринэн үлэлээбитэ. Тит Данилович Григорьев аатырбыт күүстээх Харахтар сиэннэрэ, 1975 сыллааҕы үбүлүөйдээх ыһыахха республика үс төгүллээх чемпионун Семен Степанович Саввиновы охторон, кырдьаҕастарга чемпион үрдүк аатын ылбыта.

Бу дьиэ кэргэҥҥэ Николай Титович 1954 с. иккис оҕонон төрөөбүтэ. Коля дуобакка оскуолатыгар, онтон оскуола үөрэнээччилэригэр оройуоҥҥа чемпионнаабыта, республикаҕа үөрэнээччилэр күрэхтэригэр үһүс миэстэни ылбыта. Бу күрэхтэһиигэ Ороһуттан Илья Кысылбаиков, Тома Борисова миэстэлэһэннэр оройуоҥҥа Кубогы илдьэ кэлбиттэрэ. Тустууга бастакы ситиһиитинэн 7-с кылааска сылдьан оскуола абсолютнай чемпиона буолбута буолар. 1971 с. Маҥаас ыһыаҕар абсолютнай чемпион үрдүк аатын ылан кыайыы өрөгөйүн билбитэ. 16 сааһыгар оройуон оҕолорго чемпионатыгар хапсаҕайга уонна көҥүл тустууга иккиэннэригэр бастаабыта, нөҥүө сылыгар Ньурбаҕа ыытыллыбыт зонатааҕы түһүлгэҕэ эмиэ чемпионнабыта. 1973-1974 сс. Советскай Армия кэккэтигэр сулууспалаан баран Таджикистаҥҥа Душанбе куоракка физкультура техникумугар үс сыл үөрэммитэ. 1979 с. Сахатын сиригэр эргиллэн кэлиэҕиттэн күрэхтэһиилэргэ өрүү кыттар.

Николай Титович Үөһээ Бүлүү — 1979 с., 1980 с., 1991 с., Уус-Алдаҥҥа — 1983 с. оройуон 10 чулуу спортсменнарын ахсааныгар киирбитэ. Саха сиринээҕи “Урожай”, “Спартак” обществолар 1979, 1980, 1981, 1983 сс., Бүлүү зонатын 1979, 1980, 1981 сыллардааҕы чемпионнарынан буолбута.

Хапсаҕай тустууга республикатааҕы турнирдарга Буучугурас, П. Пинигин, Бычырдаан, В. Румянцев, В. Быкалыров, В. Ефремов, П. Алексеев, “Хаҥалас хапсаҕайа”, И. Халдеев, С. Ли-Фу, Н. Брызгаев, М. Эверстов, Федерация Кубога, В. Андросов, Р. Цыпандин, Н. Давыдов бириистэригэр 13-тэ бастакы, 16-та иккис, 13-тэ үһүс миэстэлэри ылаттаабыта.

1983 с. Ис дьыала органнарыгар үлэҕэ киириэҕиттэн милициялар зонатааҕы да, республикатааҕы да күрэхтһиилэригэр чемпионнуур.

         2003 с. самбоҕа 90 киилэҕэ киирсэн республика чемпиона буолбута, 2000 с. генерал В.К. Измеров бирииһигэр уонна аатырбыт спортивнай комментатор, биллиилээх самбист  В. Степанов бирииһигэр ыытыллыбыт республикатааҕы таһымнаах күрэхтэһиилэргэ 90 киилэҕэ чемпион аалай лиэнтэтин кэтэр чиэскэ тиксибитэ.

         1976 с. көҥүл тустууга ССРС спордун маастарыгар кандидат буолбута, 1983 с. хапсаҕайга Саха АССР спордун маастарын аатын ылары ситиспитэ, 1987 с. самбоҕа ССРС спордун маастарыгар кандидат буолбута, гиирэ спордугар, саахымакка, дуобакка I разряды толорбута.