Хайа да улууска, ол иһигэр Үөһээ Бүлүү улууһугар хапсаҕай хайа баҕарар ыйааһыныгар күүстээх бөҕөстөрү солбуйар бөҕөстөр кэмэ кэлэн солбуйсан биэрэн иһэллэр. Ол курдук Петр Егоровы, Күүстээх Ильины, Сергей Ли-Фуну, Михаил Малардыровы Түргэн Ыстапаан, Чөҥкөй Дьөгүөр, Уран Ньукулай, Бырдака Балыарый солбуйбуттара, аны кинилэр тусталлара бытааран, сааһыран истэхтэрин аайы Константин Васильев, Павел Гаврильев, Аскалон Николаев, Александр Кардашевскай, Валерий Федоров, Олег Иванов солбуйан тахсыбыттара. Аны бу биллиилээх бөҕөстөрү солбуйан эдэр бөҕөстөр Владимир Степанов, Семен Тимофеев, Рустам Прокопьев, Федор Данилов, Увар Тимофеев тустар кэмнэрэ кэлбитэ. Дьэ биир оннук бөҕөһүнэн аатырбыт бөҕөс Степан Степанов (Түргэн) балта Мария Егоровна Степанова уонна аҕата Иванов Егор Егорович төрөппүт уоллара, төрүт Кырыкый олохтооҕо Олег Иванов буолар.

         Олег 1961 с. Кырыкыйга төрөөбүтэ уонна харыс да сири халбарыйбакка олорор, 5 оҕолоох, сылгы, ынах сүөһү ииттэр. Олег совхозтар ыһылла иликтэринэ Кырыкый отделениетыгар үлэлиирэ. Кыра эрдэҕиттэн тустуунан дьарыгырбыта, төһө да намыһах уҥуохтааҕын иһин үчүгэйдик волейбол оонньуура. Симиллибит курдук эттээх-сииннээх,  модьу киһи этэ. Олох оҕо сааһыттан 80 кг ыйааһыҥҥа тустара, бэрт сотору ыарахан ыйааһыҥҥа көспүтэ. Оскуола кэмигэр оҕолор ортолоругар көҥүл тустууга улууска, Бүлүү зонатыгар бастыыра. Онтон сааһа ситэн улахан дьоҥҥо тустарыгар оройуон биир күүстээх тустууга буолбута. Ордук табыллан хапсаҕай тустууга тустубута, улууска хас да сыл инники сылдьыбыта. Элбэх сыл Александр Кардашевскайдыын, Николай Григорьевтыын, Валерий Федоровтыын, Константин Васильевтыын илин-кэлин түһүспүттэрэ, бу уолаттартан ордуктара Александр Кардашевскай этэ. Ол иһин да Саша Манчаары Спартакиадатыгар үс төгүл II-c миэстэни ыллаҕа. Коля да оччо хаалсыбатаҕа, икки төгүл II-с миэстэни ылбыта, Олег Иванов П.Е. Алексеев бирииһигэр икки төгүл II-с, икки төгүл III-с миэстэни ылбыта, ону таһынан Сунтаарга ыытыллыбыт республика чемпионатыгар I миэстэни ылан турардаах. Ветеран сааһыгар тахсан баран Манчаары Спартакиадатыгар ыарахан ыйааһыҥҥа IV миэстэни ылбыта, ону таһынан улууска ыытыллар турнирдарга бастыыра, таайын Түргэн бирииһигэр, Сэмэтээскилэр бириистэригэр, республика турнирдарыгар, Буучугурас, Бычырдаан, “Хаҥалас хапсаҕайа”, В. Румянцев бириистэригэр миэстэлэһэрэ, бастыыра. Бу күрэхтэһиилэргэ Саха сирин ааттаахтарын П. Адамовы, Н. Баттаховы, Л. Николаевы, Максим Васильевы, Н. Григорьевы, Вал. Федоровы, П. Гаврильевы кытта илин-кэлин түсүһэрэ, хайа да ааттаах сэрэхэдийэр бөҕөһө буолбута. Ветераннарга күүскэ тустуох курдук буолан иһэн, атаҕын травмата бэргээн, олох да кыайан хаампат буола сыспыта, ону дьулуһан-дьаныһан атаҕын эрчийэн, күүһүнэн хааман-сиимэн билигин аматыйан эрэр, оттуур-мастыыр, бэл, тутуу тутуһар буолла,  ыарыыны кытта 10-тан тахса сыл дьаныһан арыый да бэттэх кэллэ.

         Олег тустарыгар илиитигэр күүстээх буолан тутуһан-хабыһан, чугастан тустарын сөбүлүүрэ, атаҕынан олуйара, сорох кэмҥэ илиитинэн олуйан охтороро, умса тардара, таайын албаһын “түргэннээһини” туттара, аа-дьуо, лоп-бааччы тустуулаах бөҕөс, сыыһа-халты туттубат, утарсааччыларыгар убаастабыллаахтык сыһыаннаһар бөҕөс буолара.

         Арай биирдэ Федерация кубогар төһө да атаҕа ыарыйдар улууһун чиэһин көмүскүү сборга киирэн дьарыктана сырыттаҕына, оччоҕо олох эдэр, бу кэмҥэ Саха сирин биир бастыҥ бөҕөһө Платон Саввинов Олег Иванову аан маҥнай көрөн баран бу курдук эппит сураҕа иһиллибитэ: “Биһиэхэ да, Үөһээ Бүлүүлэргэ, күүстээх көрүҥнээх, модьу-таҕа бөҕөстөр бааллар эбит” — диэбит. Платону, Олегы айбыт айылҕалара хас биирдиилэригэр 15 см үрдүгү биэрбитэ буоллар, хайдах-туох тустуохтарын өйгөр оҥорон эрэ көрөҕүн, дьэ күүс-уох, көрүҥ-таһаа буолуо этилэр ээ уолаттар барахсаттар.

         Дьэ ити курдук Кырыкый нэһилиэгэр Ивановтар, Степановтар аймахтаан туран тустуунан ситиһиилээхтик дьарыктаммыт дьон. Олег Иванов ийэтин убайдара Степан Егорович (Түргэн бөҕө), уола Сахамин ССРС көҥүл, классическай тустууларга спордун маастара, биир убайа Иван Егорович уола Дмитрий көҥүл тустууга маастарга кандидат, иккис уол Семен Степанов боксаҕа РФ спордун маастара, Саха сирин чемпиона, РФ эдэрдэрин кыайыылааҕа. Ити курдук улуус, Саха сирин биир күүстээх хапсаҕайдьыта Олег Иванов тустуук, киһи быһыытынан дьоҥҥо-сэргэҕэ убаастатан төрөөбүт нэһилиэгэр сиэннэрин, оҕолорун кытта тыа ыалын сиэринэн сылгы-сүөһү ииттэн дьоһуннаахтык  олороллор. Олег Егорович эһэтэ, аҕата ааттаах булчут дьон этилэр, ол сиэринэн Олег эмиэ бултанар, күһүн-саас куска-куобахха сааланар.