Аҕалаах ийэтэ үлэни өрө туппут дьоннор, колхоз, совхоз үлэтигэр элбэхтик үлэлээн оҕолорун иитэн үөрэхтээх, үлэһит дьон оҥортообуттара. Ийэлэрэ билигин да Харбалааҕар уолун Бүөтүрү кытта олорор. Проня дойдутугар 5 кылааһы бүтэрэр уонна убайдарын кэнниттэн Нам улууһун тустууга оскуолатыгар эрчиллэ тиийэр. Кинини Намҥа ССРС спордун маастара С.Ф. Алексеев уонна оччолорго эдэр тренер, ССРС спордун маастара Б.Пр. Егоров эрчийэллэр. Бу тренердэртэн билигин Борис Прокопьевич РФ үтүөлээх тренерэ буола үүнэн таҕыста. Уол бу улахан тренердэргэ оскуоланы бүтэриэр дылы дьарыктанар. Кинини ССРС-ка, Россияҕа, аан дойдуга тиийэ биллибит РФ үтүөлээх маастара буолбут Петр Юмшанов эрчиллэр. Уолаттар 18 саастарын туолаат, аармыйаҕа сулууспалыыллар. Проня аармыйаҕа сулууспалыы сылдьан РФ Сэбилэниилээх Күүстэрин чемпионатыгар II м ылар уонна РФ спордун маастара буолар. Проня 57 кг ыйааһыннаахтар Н. Тарскай бирииһигэр 1994 с. IV м ылар. 1992 с. “Көмүс кур” Аан дойдутааҕы турнирга III м, Бүтүн Союзтааҕы Д.П. Коркин бирииһигэр II м ылар. Хапсаҕай тустууга 1993 с. Бүлүү зонатын чемпиона, 1993, 1994, 1995 сс. В. Румянцев бирииһин 60 кг чемпиона буолар. Үөһээ Бүлүүгэ ыытыллар республиканскай турнирдарга, Н.К. Докторов-Бычырдаан, Буучугурас бириистэригэр хас да төгүл бастаталыыр.

         Покровскай куоракка Манчаары Спартакиадатыгар 1993 с. 60 кг чемпион бочуоттаах аатын ылар, Чурапчыга ыытыллыбыт “Тыа сирин оонньууларыгар” 60 кг II м ылар. Маны таһынан 2007, 2009, 2015 сс. Үөһээ Бүлүү улууһа Федерация кубогын кыайыытыгар 70, 80, 90 кг ыйааһыннаахтарга тустан, дьоһуннаах тустууну көрдөрбүтэ. Бу тустууларга көрдөххө Прокопий урут төһө да тустар ыйааһыныттан үөһэ тахсан туһуннар түргэн хамсаныылаах, баай албастардаах, бириэмэни, көбүөрү көрөн-истэн тустара, кини чахчы хапсаҕайы баһылаабыт бөҕөс буоларын көрдөрбүтэ.

         Прокопий Үөһээ Бүлүүтээҕи оҕо спортивнай оскуолатыгар тренеринэн 6 сыл үлэлээбитэ, өссө Харбалаахха 2 сыл физругунан үлэлээбитэ. Төрөппүт уола Ньургун улахан тустуук буоларыгар сыралаһан үлэлэспитэ. Прокопий Прокопьевич икки оҕолоох 1 кыыс, ньир-бааччы ыал, Дьокуускай куоракка олороллор, үлэлииллэр. Прокопий билигин предприниматель, тутуу үлэтинэн дьарыктанар, таһаҕас таһар.

         Бырааттыы Александровтар-Уларовтар туруоруммут сыалларын ситиһэн биллиилээх спорт маастардара буоллулар, дьоһуннаахтык үлэ-хамнас үөһүгэр сылдьаллар.

Бырааттыы Александровтар-Уларовтар кыра бырааттара Прокопий аҕатын аатын сүкпүт. Кини 1971 с. Харбалаахха төрөөбүтэ. Бүгүн Прокопий хапсаҕай тустууга ситиһиилэрин сырдатыахпыт.

Прокопий  1993 с. Бүлүү зонатын чемпиона, В. Румянцев бирииһин 1993, 1994, 1995 сс. чемпиона уонна Саха АССР спордун маастара буолар. Кини 60 кг ыйааһыннаахтарга тустара. Прокопий Александров Үөһээ Бүлүүгэ Н.К. Докторов-Бычырдаан, Буучугурас бириистэрин кыайталыыр, 1993 с. Покровскайга Манчаары оонньууларыгар 60 кг чемпионнаабыта, Чурапчыга буолбут тыа сирин оонньууларыгар 60 кг  II м ылбыта. Прокопий эмиэ убайын курдук чочуллубут албастаах бөҕөс, биир уратыта 60, 70, 80, 90 кг ыйааһыннарга модьураатаҕын аайы биир тэҥник үчүгэйдик тустар. Аһара үчүгэйдик атахха киирэр, хоннох аннынан киирэн тиэрэ көтөр, көтөҕөн да таһаарыан сөп. Төрөппүт уола Ньургун Россия спордун көҥүл тустууга норуоттар икки ардыларынааҕы кылаастаах маастара. Онон Прокопий аҕата Борокуоппайтан, убайдарыттан утумнаан күүстээх бөҕөс буолбутун аны оҕото салҕаата уонна аһара түстэ.