Яков Николаевич төрүт Кырыкый, манна төрөөбүтэ, улааппыта, учуутал идэтигэр үөрэнэн баран Хороҕо аҕыйах сыл үлэлээбитэ уонна Кырыкыйыгар төннөн олорор, үлэлиир. Маҥнай үлэтин туһунан сырдатыахха, Яков 1957 с. төрөөбүтэ, аҕата Николай Степанович Григорьев үлэни өрө туппут киһи үтүөтэ киһи этэ, Кырыкыйыгар өр кэмҥэ тутууга, кыһын кадровай булчутунан үлэлээбитэ. Саха сирин, оройуон биллиилээх булчута этэ. Ийэлэрэ Егорова Екатерина Федоровна эмиэ Ньукулай курдук үлэни өрө туппут, нэһилиэк биир бастыҥ үлэһитэ этэ. Яков Николаевич ийэтин быраата Егоров Петр (Бэчээт) Саха сирин биир биллиилээх бөҕөһө этэ. Яков Николаевич элбэх оҕолордоох ыал иккис оҕото, кини эдьиийэ, балта учууталлар, онон бу биир ыалтан үс учуутал Кырыкыйга үтүө суобастаахтык үлэлии сылдьаллар.

         Яков Егоров оҕолору үлэ уруогар үөрэтэр, кини илиитин иһинэн сүүһүнэн оҕо үөрэнэн, уһанан кэлэн аастылар, талааннаах оҕолор идэ ылан үлэлии-хамсыы сылдьаллар. Яков Николаевич оҕо эрдэҕиттэн уруһуйунан, чеканканан дьарыктанара, онтун сайыннаран оҕолору үөрэппитэ, быйыл 37-с сылын учууталынан үлэлээн түмүктээтэ. Сыллата республика иһинэн ыытыллар араас быыстапкаларга оҕолорун кытта ситиһиилээхтик кыттар. Быйыл алтыс төгүлүн ыытыллар оҕолор Азиятааҕы оонньууларыгар выставкаҕа кыттаары үлэ бөҕөтө, бу маннык выставкаларга хаһыс да кыттыыта. Ону таһынан булчуттар, балыксыттар тэрээһиннэригэр араас кыыл-көтөр чуучалатын оҥорон ситиһиилээхтик кыттар. Маны таһынан күһүн уоппускатын кэмигэр аар тайҕаҕа тахсан бултуур үгэстээх. Улахан бултка аҕатын бииргэ төрөөбүттэрэ, уонна аҕата Ньукулай сүүнэлээх булчуттар этилэр, ону удьуордаан эбитэ дуу, Дьаакып эмиэ сорсуннаах булчут, мээнэ түбэһиэхчэ дьон бултаабат бултарын — тыатааҕыны элбэхтик бултаата, арҕахтан да, ытынан үрдэрэн да элбэҕи бултаата, арааһа 20-тэн таҕыстаҕа буолуо, былырыын бултаабыт эһэлэрэ олох аарыма үһү, онтон атын булдунан куобаҕынан-куһунан, балыктааһынынан дьарыктаммат — “халлаан, уу үөннэрэ” диэн ааттыыр. Кырдьыга сылы эргиччи бокуойа да суох киһи. Яков Николаевич өр сыллаах сыралаах үлэтэ сөптөөхтүк сыаналанар диэххэ сөп. Кини түөһүн СР үөрэҕириитин туйгуна, СР физическэй культураҕа, спортка туйгуна, уопсай үөрэхтээһин бочуоттаах үлэһитэ, 21 үйэ учуутала, норуот маастара, Кырыкый нэһилиэгин бочуоттаах олохтооҕо үрдүк ааттар знактара киэргэтэллэр.

         Тустууну таптааччылар, тустууктар ортолоругар Яков Николаевич “Дьаакып” диэн аатынан биллэр. Маҥнай утаа Дьаакып көҥүл тустуунан дьарыгырбыта да үөтэлээбэтэҕэ, анал тренер, эрчиллии да суоҕа. Онтон оскуола кэнниттэн тута хапсаҕайдаһан барбыта. Маҥнай утаа хоттороро, ол эрэн Дьаакып дьаныһан тустан хас куоталаһыы аайы кыттара, табыллан туһуннаҕына 2-3 миэстэни ылара, үчүгэй албастара суоҕа, албаһы эмиэ М. Бочетов курдук соччо ылыммат этэ, ол эрэн Михаил курдук атын бөҕөстөр туттубат албастарын оҥортуура, холобур утарсааччыта атахха киирдэҕинэ, утары өссө алларанан атахтыыра уонна хотуулаах тахсара. Дьаакып итинник эриһэн ветераннарга тустар кэмигэр олус табыллан тустубута. Хапсаҕайга республика бастакы фестивалыгар 1999 с. саха аатырбыт бөҕөһө Роман Цыпандин атахха киирбитин, утары өссө аллараанан атахха киирэн хоппута, дьэ мантан санаата көтөҕүллэн СР чемпионатыгар кыттар буолбута. Ити сыл П.Е. Алексеев төрөөбүт Ньурбатыгар Биэччэ Бөҕө 60 сааһыгар аналлаах чемпионатка 70 кг ыйааһыннаахтарга биир дойдулааҕа Аскалон Кардашевскай кэнниттэн II м ылбыта, онтон 2000, 2001, 2002, 2003 сыллардааҕы чемпионаттарга кыттан кыл-мүччү бириистээх миэстэҕэ тиксибэтэҕэ, онтон 2004 с. Сунтаарга буолбут чемпионатка III м ылбыта, хас да күүстээх бөҕөһү хоппута, онно эмиэ утары атахтыыр албаһа абыраабыта. Онон Дьаакып САССР маастара буоларыгар 1 чемпионскай баал наадата тирээбитэ, 2 хас сыл дьаныардаах күрэхтэһиилэр кэннилэриттэн номоххо сылдьар аатырбыт бөҕөс Н.К. Докторов-Бычырдаан бирииһин көбүөрэ Үөһээ Бүлүүгэ тэлгэммитэ. Бу түһүлгэҕэ Дьаакып ыйааһыныгар 12 бөҕөс 5 улуус уонна 2 спорт маастара бааллара. Бу тустууну кыайдаҕына САССР маастара буолуохтааҕа. Сорук чуолкай – бастакы миэстэ. Ол эрэн утарсааччылар күүстээхтэр, кинилэр эмиэ маастар буоларга баҕалара улахан. Дьаакып көрсүбүт 4 бөҕөһүн ыраастык хототтоон, өр сылларга дьаныспыт баҕатын — маастар нуорматын толорор, ол эрэн ити тустуу кэннэ тутатына ветераннар ортолоругар маастар нуормата  сотуллар, хас да төгүллээн докумуоннар оҥоһуллан бараллар да барыта төннөр. Икки сыл анараа өттүгэр “Сахаада-спорт” иһинэн маастар нуормата олохтоноругар кэпсэтии барар, ол кэннэ быйыл Алексей Егорович Мостахов дьаныардаах туруорсуута өйөнөн дьаһал тахсар. Маҥнайгы ааттаммыт 5 бөҕөс иһигэр Дьаакып аата баарыттан үөрүү-көтүү буолар, онон кини өр сыллаах дьаныардаах тустуута түмүктээх буолла.