Антонов А.В. 1957 с. Үөһээ Бүлүү Ороһутугар төрөөбүтэ. Төрөппүт аҕата Василий Антонов хайа баҕарар хара үлэни кыайар-хотор хоһуун үлэһит эбитэ үһү уонна нэһилиэктэр ыһыахтарыгар бастакы бириискэ тустан мэлдьи бастыыра үһү.

         Анатолий оскуолаҕа үөрэнэ сылдьан тустуунан үлүһүйэн туран дьарыктанар. Кинини Ороһу аҕыс кылаастаах оскуолатыгар Иванов А.П., Нам орто оскуолатыгар үөрэнэр сылларыгар Д.Д. Кривошапкин эрчийэллэр. Оскуолаҕа үөрэнэ сылдьан көҥүл тустууга оскуола, оройуон чемпиона буолар, кыайыы өрөгөйүн үөрүүтүн билэр.

         Анатолий 1975-1976 сс. Улан-Удэ куоракка Армия спортивнай кулуубугар (СКА) спортротаҕа эрчиллэр. Сулууспалыыр кэмигэр классическай тустууга Забайкальскай байыаннай уокурук зонатын чемпиона буолар, уокурукка 68 кг ыйааһыннаахтарга II м тахсан I разрядтанар.

         Армияттан кэлэн баран 1979 с. көҥүл тустууга оройуонугар бастыыр, оттон хапсаҕайынан утумнаахтык дьарыктанан барар. 1983 с. Физкультурниктар күннэригэр ыытыллыбыт маастар нуормалаах Дьокуускай куорат абсолютнай чемпионатыгар сэрэтиинэн хотторон иккис буолар, кыл-мүччү маастар аатын ылбат. Бу 1988 с. эмиэ хатыланар, Анатолий эмиэ иккис буолан маастар аатыттан көрө матар. Ол эрэн Анатолий хапсаҕайдьыт быһыытынан биллэр-көстөр тустуук буолар. 1984 с. Бүлүү улууһун юбилейдаах ыһыаҕар 70 кг II м, бу ыйааһыҥҥа 1986 с. П.П. Пинигин республиканскай турнирыгар III м, 1987 с. Бычырдаан бирииһигэр II м ылаттыыр, ити сыл Тулагыга Саха сирин студеннарын абсолютнай чемпионаттарыгар эмиэ II  м тахсар. Анатолий илиитигэр олус күүстээх, тирэхтээх бөҕөс, кини түргэннээһиннэриттэн, халбарыйыыларыттан элбэх биллиилээх маастардар охтубуттара.

         Анатолий Васильевич дойдутугар Ороһуга нэһилиэк баһылыгынан 13 сылын таһаарыылаахтык үлэлии-хамсыы сылдьар. Кини бэйэтэ спортсмен буолан спорду өйүүр, 1991 с. үп-харчы кризиһин кэмигэр биир-биэс харчыта суох, олохтоохтору көҕүлээн оройуоҥҥа бастакы спортивнай сааланы туттарбыта, 2008, 2010, 2011 сс. туйгун үлэтин иһин улуус бастыҥ баһылыгын аатын ылбыта, Ороһу, Харбалаах нэһилиэктэрин бочуоттаах олохтооҕо, республика норуотун хаһаайыстыбатын үтүөлээх үлэһитэ.