1959 сыл кулун тутар 3 күнүгэр Үөһээ Бүлүү нэһилиэгэр Васильевтар дьиэ кэргэттэригэр үһүс оҕонон күн сирин көрбүтэ, И. Барахов аатынан орто оскуоланы бүтэрбитэ.

Кыратыттан сытыы-хотуу, үлэһит, бэрээдэктээх уол дьиэ кэргэттэригэр, аймахтарыгар, чуолаан аҕатыгар Василий Севастьяновичка үөрүүнү-көтүүнү эрэ аҕалара. Толя кыратыттан тустуу секциятын көтүппэккэ сылдьара. Оскуолаҕа ыытыллар спортивнай күрэхтэргэ барытыгар кыттара, спортка улахан дьоҕурдааҕа биллибитэ.

1980 с. СПТУ-га суоппар идэтигэр үөрэнэ киирбитэ. 1981 с. суоппар идэтин ылан  “Үөдүгэй” совхозка суоппарынан үлэтин саҕалаабыта. Суоппардыы сылдьан кэргэннэммитэ, оҕоломмуттара, дьиэ-уот туттубута, олоххо миэстэтин булуммута. ”Үөдүгэй” совхоз бастыҥ суоппара, аҕа табаарыстарын үлэҕэ опыттарыгар, дьулуурдарыгар үөрэнэн идэтин үчүгэйдик баһылаабыт үлэһит быһыытынан совхоһугар биллибитэ. Анатолий Васильевич үлэҕэ үрдүк көрдөрүүлэрэ Бочуотунай грамоталарынан, ЫБСЛКС Киин Комитетын знагынан бэлиэтэммитэ, “Үөдүгэй” совхоз чемпион суоппара буолбута.

Анатолий 1980 с. көҥүл тустууга Бүлүү зонатын күрэхтэһиитигэр утарсааччыларын кыайталаан чаҕылхайдык призердаабыта. Бүлүү зонатыгар 68-74 кг ыйааһыннарга элбэхтик тустан призердаабыта.

Манчаары Баһылай Спартакиадатыгар 1981 с. бэс ыйын  20-21 кк. Мэҥэ-Хаҥаласка   хапсаҕайга 70 кг ыйааһыннаахтарга Иван Захаров (Амма) кэнниттэн иккис миэстэни ылбыта, саха биир чулуу тустуугун Анатолий Константинов (Уус-Алдан) үһүс миэстэҕэ үтэйбиттэрэ.

Анатолий Васильевич олус сытыы киириилээх тустуук. Көбүөргэ киирдэҕинэ кимтэн да толлубат, кыайарга эрэ дьулуһар. Кини оройуон, Бүлүү зонатын, совхоз, араас обществолар, ыһыахтар күрэхтэһиилэригэр кыайбыт-хоппут кэмнэрдээх. Ол эрээри Анатолий Васильевич 25 сааһыгар дылы тустубута. Киэҥ-куоҥ спортсаалларга эрчиллибэтэх киһи, эрчиллэргэ ханнык да усулуобуйата, бириэмэтэ суоҕун үрдүнэн, сүрэҕин дьулуурунан, оройуонун чиэһин ситиһиилээхтик көмүскээбитэ. Үксүн массыына уруулуттан илиитин араарбакка үлэлии сылдьан көбүөргэ элбэхтик тахсыбытын, кыайбытын дьон билэр, үрдүктүк сыаналыыллар.