Васильев Степан Макарович 1931 сыллаахха Үөһээ Бүлүү Мэйик нэһилиэгэр төрөөбүтэ.  Кини Саха сиригэр көҥүл тустуу саҥардыы сайдыытыгар биир бастакынан ылсыһан түһүлгэҕэ тустубут бөҕөстөртөн биирдэстэрэ буолар. Советскай Армия кэккэтигэр үс сыл сулууспалаан кэлээт Бүлүүгэ К.П. Григорьев секциятыгар дьарыктанан барбыта.

         1956 сыл көҥүл тустууга республика бастакы чемпионатыгар Степан Васильев 58 кг тустубута. Кинини кытта бииргэ эрчиллибит уолаттара, ол иһигэр кэлин үтүөлээх тренер Н.Н. Волков, Александр Федоров, Иван Чабыев, Федор Павлов, Игнатий Каратаев бары бэйэлэрин ыйааһыннарыгар ситиһиилээхтик тустубуттара.  Степан Васильев кэлин Россия чемпиона буолбут Николай Гоголевтыын сэттэ мүнүүтэ эрбии биитин курдук тэбис-тэҥҥэ тустар, тиһэҕэр Н. Гоголев кыайыытынан хапсыһыы түмүктэнэр. Онно Гоголев эппит этэ «маннык уһуннук миигин кытта эриспит тустуук суох этэ» - диэн. Ол сөҕүүнү Степан Макарович бэрт хойукка диэри ахтааччы. Кэлин оройуонугар Бүлүү бөлөх оройуоннарын күрэҕэр көҥүл тустууга өрүү инники миэстэҕэ сылдьыбыта.

         Кини тустарыгар атаҕынан олуйар, эрийэр, иһинэн-таһынан тэбэр, мельницаны, вертушканы эҥкилэ суох оҥорорун үөлээннээхтэрэ сэһэргээччилэр. Онтон партерга түһэрдэххинэ «турецкай кыптыыйдааһын» миэнэ диэччи. Киһи быһыытынан аламаҕайа сэргэх табаарыс этэ. Ыһыахтарга хойукка диэри тустара, эдэригэр атах оонньуура. Көҥүл тустууга өссө үчүгэйдик тустуон доруобуйатынан сыыйыллан тохтуур.  Ол да буоллар тустар баҕата баһыйан хапсаҕайдаһан тустууга ветераннарга 50-н ааһыар диэри тустан миэстэлэспитэ. Бүтэһигин Сургуулукка Семеновтар – «Сэмэтээскилэр» бириистэригэр эдэр ветераннары кытта тэҥ киирсиигэ 3-с миэстэни ылары ситиһэр. Кэлин төһө да ыалдьа сырыттар улууска буолар спортивнай күрэхтэри ордук тустуулары көтүппэт, ыһыылаах- хаһыылаах көрөөччү, «ыалдьааччы» кини этэ.

Степан Васильев – Саха АССР хапсаҕайдаһан, көҥүл тустууга Республика призера.