1952 с. ыам ыйын 26 к. Үөһээ Бүлүү сэлиэнньэтигэр төрөөбүтэ, 1969 с. И. Барахов аатынан орто оскуоланы бүтэрбитэ.

1970 с. СГУ лечебнэй факультетыгар үөрэнэ киирбитэ, 1976 с. врач дипломун ылан Өймөкөөн оройуонугар участковай балыыһаҕа кылаабынай врач быһыытынан ананан үлэлээбитэ.

1978-1980 сс. клиническэй ординатураны үөрэнэн бүтэрбитэ, Эдьигээн оройуонугар кылаабынай враһынан ананан икки сыл үлэлээбитэ. 1982 с. төрөөбүт оройуонугар үлэлии кэлбитэ, родильнай отделение сэбиэдиссэйинэн үлэлээн барбыта. Эмчит быһыытынан дириҥ билиилээх врач, чэпчэки илиилээх хирург, уустук операциялары оҥортоон элбэх ийэни өлөр өлүүттэн быыһаан, оҕолоро тыыннаах хааларын ситиспитэ. Үгүс түбэлтэлэргэ операция бириэмэтигэр бэйэтин хаанын ыарыһахтарга биэрэрэ. Үтүө суобастаах, дьон олоҕун туһугар кыһамньылаах, сыралаах үлэтин иһин тэрилтэ администрациятын, профсоюһун элбэх ахсааннаах Бочуотунай грамоталарынан, райсовет уонна ССКП райкомун Бочуотунай грамоталарынан наҕараадаламмыта.

Оскуолаҕа үөрэнэр сылларыгар көҥүл тустуунан, хапсаҕайынан дьарыктаммыта. 1968 с. Саха сиригэр аан маҥнай ыытыллыбыт Манчаары Баһылай Спартакиадатыгар 63 кг эдэрдэргэ республика чемпионун үрдүк аатын сүкпүтэ. 1969 с. Баһылай Манчаары II-с Спартакиадатыгар Мэҥэ-Хаҥалас оройуонугар III-с призер буолбута. Онон нэһилиэк эдэр тустууктара кэнэҕэски кыайыыларыгар бастакы суолу Николай Николаевич Давыдов тэлбитэ.