Денис Денисович спорта: Хапсагай, вольная борьба

Достижения:

хапсаҕайдаһан тустууга Саха АССР маастара, өр сылларга физкультура учууталынан, военругунан ситиһиилээхтик үлэлээбитэ.

         Денис Нам оскуолатыгар үөрэнэ сылдьан чэпчэки атлетиканан дьарыктаммыта. Чэпчэки атлет буолаары Дьокуускайдааҕы 1 №-дээх педучилище физкультурнай отделениетыгар 1963 с. үөрэнэ киирбитэ. Бу училищены 1967 с. бүтэрэригэр Денис Кривошапкин 78 кг ыйааһыҥҥа республика биир күүстээх тустууга буолбута. Кини көҥүл тустууга 78 уонна 82 ыйааһаннарга республика чемпионатын түөрт төгүллээх призера буолбута.

         Хапсаҕайга Бүлүү зонатын 1980 с. абсолютнай чемпиона. Үөһээ Бүлүү оройуонун чиэһин көҥүл тустууга 1967-1985 сс. быыстала суох ситиһиилээхтик көмүскээбитэ. Нам оскуолатыгар физкультура учууталынан үлэлии сылдьан элбэх оҕону тустууга эрчийбитэ. Кинилэртэн Василий Данилов, бырааттыы Кардашевскайдар, бырааттыы Софроновтар, Клавдий Захаров, Виктор Осипов, Аскалон Николаев салгыы Чурапчыга үөрэнэннэр тустуу маастардарынан буолбуттара.

         1978 с. Нам оскуолатын эдэр армеецтара Д.Д. Кривошапкин салалтатынан “Орленок” оонньуу Бүтүн Союзтааҕы финалыгар Днепропетровскай куоракка 150 хамаандаттан 63-с миэстэни ылбыттара.

         Денис орто физкультурнай үөрэхтээх, олоҕун оҕону иитиигэ, общественнай бэрээдэги көрүүгэ анаабыт киһи уонна хапсаҕай, көҥүл тустуунан тэҥинэн дьарыктанан хапсаҕайга Саха АССР спордун маастара, көҥүл тустууга ССРС спордун маастарыгар кандидат буолбута. Н. Тарскай бирииһигэр 1967, 1970 сс. 82 кг ыйааһыннаах бөҕөстөргө III, II м ылаттаабыта. Денис Денисович Нам орто оскуолатыгар военругунан үлэлээбит кэмигэр оҕону байыаннай үөрэхтээһиҥҥэ үчүгэй үлэлээҕинэн биллибитэ. Оччотооҕута “Орленок” диэн үөрэнээччилэр байыаннай күрэхтэригэр оройуоҥҥа, республикаҕа бастаан аатырбыта, ону таһынан Россия, Советскай Союз таһымыгар ситиһиилээхтик күрэхтэспиттэрэ. Бу үлэлиир кэмигэр көҥүл, хапсаҕай тустууга үлэлэһэрэ, аатырбыт бөҕөс В.А. Бырдакаровы кытта сүбэлэһэн тустуох уолаттары Чурапчыга улуу тренер Д.П. Коркиҥҥа ыытан үөрэттэрбиттэрэ үтүө түмүктээх буолбута. 

         Д.Д. Кривошапкин кэлин милиция офицерын быһыытынан үтүө суобастаахтык сулууспалаабыта. Пенсияҕа тахсан баран 1995 сылтан милиция үрдүкү оскуолатыгар үлэлээбитэ, 2006 с. Дьокуускай куоракка олорон эмискэ ыалдьан өлбүтэ. Денис Кривошапкин олоҕун тиһэх сылларыгар Дьокуускай куоракка ведомственнай охранаҕа үлэлээбитэ. Кини Дьокуускай куоракка үөрэнэр кэмигэр Саха сирин, Россия үтүөлээх тренерэ Н.Н. Волковка эрчиллибитэ уонна Саха сирин күүстээх бөҕөстөрүн кытта тэҥҥэ тустубута. Кинилиин бииргэ үөрэммит А.Е. Мостахов, С.Ф. Алексеев уо.д.а. бииргэ эрчиллибиттэрэ.

         Денис Кривошапкин сырдык кэриэһигэр эдэрдэр ортолоругар бэртээхэй турнир хас да төгүл тэриллэн ыытылла сылдьыбыта. Бу турнирдар Нам, Хоро нэһилиэктэригэр ыытылла сылдьыбыттара, оччолорго 17-18 саастаах уолаттар билигин Саха сирин күүстээх бөҕөстөрө буола үүннүлэр. Ол курдук, 55 кг чемпиона Егор Иванов Саха сирин 2 төгүллээх чемпиона, Ньургун Егоров (Хаҥалас) СР спордун маастара, Айхал Крылатов СР эдэрдэргэ чемпиона уо.д.а. Бу турниры оччолорго А.Д. Николаев, Нам нэһилиэгин баһылыга С.С. 

Павлов, чугас доҕоро А.Е. Мостахов тэрийэн ыыппыттара. Кэлиҥҥи турниры улуустааҕы спорт управлениета (начальник Е.А. Николаев) тэрийбиттэрэ.