1965 с., 18 сааһын туола да илигинэ, В.И. Степанов-Буучугурас маҥнайгы бирииһигэр 80 кг ыйааһыннаахтарга улахан дьону кытта тустан I м ылбыта. Ол куоталаһыыга саастарын сиппит, Василий Дойдуковтан кырата 5-6 сыл аҕа саастаах дьон тустубуттара. Ол курдук 53 кг Алексей Николаев, 58 кг Павел Иннокентьев, 63 кг Анатолий Семенов, 70 кг Егор Прокопьев, 80 кг үөһэ Валерий Бырдакаров бастаабыттара, онно холоотоххо В. Дойдуков 17 сааһын туолан сылдьар кэмэ этэ. Ити сыл иннигэр Саха сирин 18-гар дылы саастаах уолаттарга 70 кг ыйааһыннаахтарга көҥүл тустууга I м ылбыта. Ол сайын Хоро нэһилиэгин ыһыаҕар, оччолорго күнүгэр сылдьар, Саха сирин биир күүстээх бөҕөһүнэн биллэн эрэр 24 саастаах, көҥүл тустууга ССРС спордун маастарын нуорматын Россия тыа сирин бөҕөстөрүгэр I м ылан толорбут Николай Корякины кытта тустубута, төһө да хоттордор балачча эриспитэ. Онтон оскуола кэнниттэн Советскай Армияҕа сулууспалаан баран дойдутугар Хомустаахха тракториһынан үлэлээбитэ уонна 1970 с. Өлүөхүмэҕэ тыа хаһаайыстыбатын техникумугар үөрэххэ киирбитэ. Механик идэтигэр үөрэммитэ. Дьэ бу кэмҥэ Баһылай 2-3 сыл күүскэ тустубута. 1972 с. ыытыллыбыт “Урожай” общество уобаластааҕы Сэбиэтин күрэҕэр 82 кг ыйааһыннаахтарга чемпион буолбута. Сүрдээх албастардаах бөҕөс буолбатах этэ буолан баран, туппутун ыыппат, албас оҥордоҕуна очко ылан тэйэр, биир кэм утарсааччытын бокуой биэрбэккэ кимэн тустара. Онтон эһиилигэр бу күрэхтэһии Н. Захаров (Сахаачча) бирииһигэр кубулутуллан тэриллибитэ уонна Амма Абаҕатыгар тустуу буолбута. Василий үөрэнэр буолан кэм дьарыктаах этэ, онон утарсааччыларын баһыйа тутан иккиһин “Урожай” общество чемпиона буолбута, бу сырыыга 90 кг ыйааһыннаахтарга бастаабыта, Саха сирин “Урожайын” күүстээх бөҕөстөрө бааллара да, I м ылбыта. Үөһээ Бүлүүлэртэн В. Бырдакаров баара уонна III м ылбыта. Үөрэҕин бүтэрэн дойдутугар Хомустаахха кэлэн механигынан үлэлээбитэ, быыһыгар тракторист буолар, хаһан да кырыы сир буолан Хомустаахха үлэһит илии тиийбэт үлүгэрэ, онон бокуой суох, тустуу сайдан дьарыга суох бөҕөс миэстэлэһэрэ уурайбыта, ону Баһылай тута өйдөөн, көҥүл тустуутун тохтоппута. Ол эрэн 1974-1975 сс. улуус иһигэр хапсаҕайдаһан көрөрө да, бастаппат этилэр, маны тута өйдөөн Баһылай хапсаҕайга да тустарын аҕыйаппыта. Баһылай биир дойдулааҕа кыыһы кэргэн ылан оҕо-уруу төрөтөн, дьиэ-уот туттан олоҕун тэриммитэ. Улахан Т-100 тракторга үлэлээн суол оҥорон, ойуур солоон бааһына оҥорон, дулҕа анньан, нэһилиэктэринэн көһө сылдьан үлэлээн авиаплощадка оҥортоон үлэ-хамнас үөһүгэр сылдьара. Кыһынын дулҕа анньан сүөһүгэ эбии аһылык бэлэмниирэ. Онон тустара олох тохтообута. Улаханнык хотторбокко сылдьан тустуу көбүөрүттэн тэйбитэ.