1965 сыл сэтинньи ыйга аан маҥнай Саха сиригэр буойун-бөҕөс, хапсаҕайга Саха сирин 1937 сыллааҕы абсолютнай чемпиона, Үөһээ-Бүлүү Мэйигин бөҕөһө Василий Иннокентьевич Степанов-Буучугурас сырдык кэриэһигэр ыытыллыбыт хапсаҕай күрэхтэһиитигэр аҕам саастаах бөҕөстөргө 70 кг. ыйааһыннаахтарга I миэстэни ылбыт, Балаҕаннаах нэһилиэгиттэн төрүттээх, өр кэмҥэ I Боотулуу нэһилиэгэр олорбут Ефимов Гаврил Гаврильевич буолар. Тустуук бу ситиһиитин 7 сыл субуруччу хатылаабыта. Бу күрэхтэһии 1965 сыллаахха аан маҥнай Үөһээ-Бүлүүгэ буолбута, оччотооҕу улуус спортка үлэһиттэрэ туруорсан тэрийбит куоталаһыыларын райсоветынан, райкомунан өйөнөн тэриллибитэ уонна Саха сиригэр киэҥ сэҥээриини ылбыта. Норуот номоҕор киирбит дьон сырдык ааттарынан күрэхтэһиилэр ити кэннэ салгыы тэриллибиттэрэ, онон оччотооҕу аҕа көлүөнэ салайааччыларга барҕа махтал буолуохтун. Дьэ ити курдук бу суруйар бөҕөспүт Г.Г. Ефимов Балаҕаннаах нэһилиэгэр 1929 с. кулун тутар ый 12 күнүгэр төрөөбүтэ. Аҕата Хабылдьыйа Хабырыыл, ийэтэ Агафья диэн эбиттэр. Элбэх оҕолоох ыаллар эбит, төрөппүттэрэ хара үлэҕэ элбэхтик эриллибит, нэһилиэк төһүү үлэһиттэрэ үһү. Икки улахан убайдара Аҕа дойду Улуу сэриитигэр ыҥырыллан баран кыргыһыы толоонугар охтубуттар. Гаврил оҕо сааһа, үөрэҕэ сэрии ыар кэмнэригэр ааспыт, ол эрэн бөҕө-таҕа,  дьулуурдаах уол Нам оскуолатыгар 7 кылааһы үөрэнэн бүтэрэн баран салгыы Бүлүүгэ педучилищеҕа үөрэнэн 1951 сыллаахха үөрэҕин бүтэрэр уонна тус хоту, Абый улууһугар алын кылаас учууталынан 1954 с. дылы үлэлиир. 1955 сылга төрөөбүт оройуонугар төннөн маҥнай Мэйиккэ, оттон Балаҕаннаахха, II Боотулуу, Маҥаас оскуолаларыгар үлэлиир, бу оскуолаларга лоп курдук 10 сыл үлэлиир. Гаврил Гаврильевич 1962 сылтан  Боотулуу оскуолатыгар ананан үлэлии кэлэр уонна СГУ-га кэтэхтэн үөрэнэн историк идэтин ылар уонна 2004 сылга пенсияҕа тахсыар диэри үтүө суобастаахтык үлэлиир. Ол аата Гаврил Гаврильевич учуутал идэтинэн 53 сыл үлэлээбит, идэтин таптыыр, төрөппүт, оҕо-аймах сөбүүүр учуутала буолан үйэ аҥарыттан ордук кэм үлэлээтэҕэ.

Г.Г. Ефимов күрэхтэһиилэргэ ордук бэлэмнээх кэлэрэ, арааһа бэйэтэ дьарыктанара. Утарсааччыларыгар өрүү үөс-батаас биэрбэккэ кимэн киирэр стиллээх тустара. 1971 с. улууһугар  бастыҥ бөҕөс буолан III Манчаары Спартакиадатыгар кыттан чемпион аатын ылбыта. Хапсаҕай тустуу элбэх албастарын баһылаабыт, сылбырҕа бөҕөс этэ. Маны таһынан көҥүл тустууга улуус иһигэр эмиэ бэркэ тустара.

         Үтүөкэннээх учуутал, хапсаҕайдьыт бэрдэ, оҕолор куттарын туппут киһи 2005 с. сайын бэс ыйын 21 күнүгэр ыарахан ыарыыттан күн сириттэн суох буолбута.