Егор Егорович Иванов II Боотулуу төрүт олохтооҕо этэ. Кини 1939 сыллаахха Чапаев түбэтигэр Балаҕат күөлгэ төрөөбүтэ. Аҕата Егор Потапович булчут идэлээх, кыраҕы харахтаах бэргэн ытааччы, булчут эбитэ үһү. Егор сэрии кэмигэр улааппыт буолан үлэҕэ-хамнаска сүрдээх сыстаҕас, кыайыгас, хотугас үлэһит этэ, тыа сирин үлэтин барытын үлэлиирэ, сатыыра, ааттаах от охсооччу, мас ууһа этэ. Ол эрэн үөрэх наадатын өйдөөн сэттэ кылааһы бүтэрэн баран Ньурбаҕа профтехучилищеҕа үөрэнэ киирэр. Тракторист, комбайнер, механик идэлэрин ылар. Кырыкыйга отделение механигынан хас да сыл таһаарыылаахтык үлэлиир. Онтон салгыы Дьокуускай тыа хаһаайыстыбатын орто салайар кадрдары бэлэмниир техникумҥа үөрэнэн аны зоотехник идэтин баһылыыр. 1971 с. үөрэҕин бүтэрээтин «Үөһээ-Бүлүү» совхоз Сургуулук отделениетыгар управляющайынан ананан үлэлиир. Сургуулукка үлэлии сылдьан дьиэтээҕи балаһыанньатынан төрөөбүт дойдутугар Кырыкыйга управляющайынан ананан кэлэн,  табаарыһа Егор Михайловтыын бииргэ үлэлииллэр. Эдэр, эрчимнээх үлэһиттэр дойдуларыгар үлэ-хамнас бөҕөнү тэрийэллэр, Егор Егорович эмиэ табаарыһа Егор Михайлов курдук үлэһит, сатабыллаах салайааччы этэ, онон Кырыкыйга  үлэ бөҕө тэриллэр. Коммунист Егор Иванов партия сорудаҕын  толорон  Үөһээ-Бүлүү оройуонун  хас да нэһилиэктэригэр Далырга, Маҥааска, Дүллүкүгэ, Сургуулукка управляющайынан үлэлиир. Үүт, эт, оттооһун оччотооҕу быһымах былааннарын толорор улуус биир бастыҥ тыа хаһаайыстыбатын салайааччытынан биллэр.

Егор Иванов ханна да тиийдэр спорду, үлэни, ырыаны-тойугу өйүүр, ирдиир салайааччы этэ. Егор Иванов айылҕаттан бөҕө-таҕа, күүстээх-уохтаах киһи этэ, бу үйэҕэ төрөөбүтэ буоллар, үчүгэй тустуук буолуон сөптөөҕө. Бу салайар үлэлэргэ үлэлии сылдьан улууска куруук тустара, бириистээх миэстэни ылара. 1981 сыллаахха улууһугар бастаан Манчаары Спартакиадатыгар Покровскайга тустан  ветераннар ыарахан ыйааһыннарыгар III м. ылар. Ити курдук кэлин бокуойа суох үлэлии сылдьан «Буучугурас», «Бычырдаан» бириистэригэр миэстэлэһэр, бастаталыыр.

         Егор Егорович сүрдээх ыраас, чиҥ туттуулаах үлэһит этэ. От оҕустун, тутуу туттун,  кини үлэтэ лоп-курдук, ыраас, чөкө туттуулаах буолара. Ол курдук төһө эмэ сааһыран баран  үс этээстээх 1-кы №-дээх И.Барахов аатынан оскуоланы сарайдаһарын сөҕө көрөрбүт. Итиччэ үрдүк дьиэҕэ саамай үрдүгэр тахсан үлэлии сылдьар буолара.

Егор Егорович үлэлии-хамсыы сылдьан 70 сааһын туолбакка эрэ орто дойду олоҕуттан ыалдьан туораабыта.