Аскалон 1956 с. Нам нэһилиэгэр төрөөбүтэ. Көҥүл тустууга ССРС спордун маастара, хапсаҕайга Саха АССР спордун маастара.

         Аскалон Чурапчыга үөрэммитэ, улуу тренер Д. Коркиҥҥа дьарыктаммыта. Көҥүл тустууга күүстээх дьарыгын тохтотон баран, хапсаҕайга көспүтэ. Кини хапсаҕайга маҥнайгы тустууттан хототтообутунан барбыта, ыһыахтарга, Буучугурас бириистэригэр кыайталаабыта. Олох үчүгэйдик тустара, сатаан да көмүскэнэрэ уонна олох сөптөөхтүк таба тутан хардары кимэн, бултаһан тустара, үчүгэйдик атахха киирэн охтороро, көтөҕөн да ылыан сөп уонна көҥүл тустуу албастарынан да тустан хототтуура. Ол курдук, 1983 с. буолбут Буучугурас бирииһигэр сүрдээх күүстээх састаапка Аскалон чемпион буолбута уонна лаппа үчүгэйдик хототтообута. Ветераннарга тахсан баран 41 сааһыгар XV Манчаары Спартакиадатыгар кими да тулуппатаҕа, чемпион буолбута, 1997 с. П. Алексеев бирииһигэр Ньурбаҕа эмиэ бастаабыта, 1998 с. П. Алексеев бирииһигэр 13 бөҕөстөн II м ылбыта, 1999 с. П. Алексеев бирииһигэр иккиһин бастаабыта. Маны таһынан 1998 с. В. Румянцев бирииһин чемпиона, Буучугурас бирииһигэр икки төгүл абсолютнай чемпион буолбута. Бу тустууга үксүн атаҕынан эрийэн сүрдээх сытыы киирсиилэргэ утарсааччыларын үөһэнэн быраҕан хототтообута. Аскалон хапсаҕай тустууга улууска да, Саха сиригэр да улаханнык охтубакка эрэ тустуутун тохтоппута.

         Аскалон Иннокентьевич орто физкультурнай үөрэхтээх, Намҥа физругунан, тренеринэн үлэлээн баран, Ис дьыала отделыгар өр сылларга үлэлээбитэ, майор званиелаах пенсияҕа тахсыбыта. Отделга үлэлиир кэмигэр самбоҕа эмиэ тустубута, Ис дьыала отделын үлэһиттэрин Спартакиадаларыгар мэлдьи бастыыра.

         Аскалон Иннокентьевич иллэҥ кэмигэр куска-куобахха уонна улахан да булка бэркэ табыллан бултуур, байанайдаах булчут. Билигин сааһыран баран тустууга судьуйалаһар, үчүгэй судьуйа буолуоҕун дьаныһан туран судьуйаласпата мэһэйдиир.  Аскалон Иннокентьевич республиканскай категориялаах хапсаҕай судьуйата..