Саха сиригэр көҥүл уонна хапсаҕай тустууларга биллэр-көстөр бөҕөстөр Аскалон, Александр Кардашевскайдар бырааттара Спартак Кардашевскай мас тардыһыытынан, самбо, хапсаҕай тустууларынан тэҥҥэ дьарыктаммыта.

         Кини маҥнай мас тардыһыытыгар бэйэтэ эрчиллэн күрэхтэһэр буолбута уонна 1997 с. Ньурбаҕа, 2009 с. Бүлүүгэ ыытыллыбыт Манчаары Спартакиадаларыгар бэһис, төрдүс миэстэлэри ылаттаабыта, 2010 с. Сунтаарга буолбут республика чемпионатыгар үһүс миэстэни ылбыта, 1994 с. Үөһээ Бүлүү улууһун, 1995 с. Бүлүү улууһун абсолютнай чемпионунан буолбута.

         Спартак хапсаҕайга ордук үчүгэй көрдөрүүлээх. Ол курдук, 2006 с. Мэҥэ-Хаҥаласка Роман Цыпандин, 2007 с. Уус-Алдаҥҥа Халдеев, 2015 с. Үөһээ Бүлүүгэ Буучугурас бириистэригэр ыытыллыбыт республиканскай турнирдарга үһүс миэстэлэри ылаттаабыта, 2014 с. Бычырдаан бирииһигэр бастаабыта. Спартак быйыл өссө биир республиканскай турниры кыайдаҕына “Сахаада-спорт” ветераннарга иҥэрэр маастарын аатын ылыан сөп.

         Спартак Иннокентьевич Ис дьыала систематыгар сулууспалыы сылдьан самбо тустууга В. Степанов бирииһигэр ыытыллар республика чемпионатыгар үһүс миэстэлээх, “Динамо” ДСО элбэх төгүллээх чемпиона уонна призера.