Егор Николаевич элбэх оҕолоох ыал тохсус оҕотунан 1970 с. тохсунньу 1 к. Үөһээ Бүлүү бөһүөлэгэр төрөөбүтэ.

         Егор 2-с №-дээх физмат оскуоланы бүтэрээт, Саха государственнай университетыгар үөрэххэ киирбитэ. Советскай Армия кэккэтигэр ыҥырыллан, онно көҥүл тустууга эрчиллэн разрядтаах тустуук буолан эргиллибитэ. Кэлбитэ да суоппар идэлэнэн баһаарынай чааска үлэҕэ киирбитэ. Ис дьыала улуустааҕы отделыгар күүс-көмө  буолара, спортивнай күрэхтэһиилэригэр Бүлүү бөлөх улуустарын Спартакиадаларыгар күрэхтэһэн кыайыыны ситиһэрэ, хамаандаларыгар төһүү-күүс буолара. Егор тустуутун сэргэ музыканан эмиэ үлүһүйэрэ, Үөһээ Бүлүү национальнай “Уолан” оркестрын активнай кыттааччыта этэ.

         Гоша оскуолаҕа үөрэнэр сылларыгар спордунан дьарыктанан Хотугулуу-Илиҥҥи зонаҕа, республика араас улуустарынан элбэхтик тустан улуус, республика чиэһин көмүскээбитэ. Кини кэнники сылларга хапсаҕайга олус тахсыылаахтык тустуталаабыта. Ол курдук, 1997 с. Буучугурас бирииһигэр III, 1997 с. бэс ыйыгар Ньурба куоракка XV Олоҥхо оонньууларыгар (Манчаары Баһылай) 62 кг II миэстэ, 1999 с. П. Алексеев бирииһигэр I миэстэни ылбыта. Кини ити күрэхтэһии түмүгүнэн Саха Республикатын хапсаҕайга спорт маастарын аатын ылбыта.

Гоша Ким бэйэтин кылгас олоҕор спортка итинник чаҕылхай ситиһиилэрдээх, өссө да элбэҕи эрэннэрэр, үүнэн иһэр талааннаах хапсаҕайдьытын быһыытынан республикаҕа биллэн иһэн төннүбүтэ.