Сергей Ким 1958 с. бэс ыйын 2 к. Үөһээ Бүлүү сэлиэнньэтигэр төрөөбүтэ. 1980 с. Красноярскай физкультурнай техникумун бүтэрэн физкультура учууталын идэтин ылбыта. Үөрэҕин ситиһиилээхтик бүтэрэн, дойдутугар 1980-1982 сс. Сургуулук оскуолатыгар, 1982-1984 сс. СПТУ-га физкультура учууталынан таһаарыылаахтык үлэлээбитэ. Тойоку оскуолатыгар уонна Үөһээ Бүлүү 2-с №-дээх физмат оскуолаҕа военругунан үлэлии сырыттаҕына нэһилиэгин олохтоохторо общественнай үлэҕэ активнай, дьоҥҥо-сэргэҕэ амарах уонна бэйэтигэр үрдүк ирдэбиллээх диэн милицияҕа үлэлии киирэригэр мэктиэлээбиттэрэ. Сергей Николаевич 1984 с. милиция отделениетыгар үлэҕэ ылыллыбыта, 1993 с. сэтинньиттэн 1999 с. балаҕан ыйыгар дылы Таатта улууһугар ГАИ начальнигынан үлэлээбитэ, 2000 с. атырдьах ыйыгар Ис Дьыала штабыгар начальнигынан үлэлээбитэ, 2008 с. алтынньыга бочуоттаах сынньалаҥҥа тахсыбыт.

Сергей 2008 с. СГУ физкультурнай университеты кэтэхтэн үөрэнэн бүтэрэн баран  олоҕун тиһэх күннэригэр диэри АКБ “Алмазэргиэнбанк” ОАО куттал суох буолуутун безопасность отделыгар кылаабынай специалиһынан үлэлээбитэ.

Эдэр эрдэҕинэ көҥүл тустуунан утумнаахтык дьарыктаммыта, ССРС спордун маастарыгар кандидат нуорматын толорбута.

1984 с. Олимпийскай чемпион П.П. Пинигин бирииһигэр республиканскай турнирга хамсаҕайдаһан тустууга абсолютнай чемпион аатын ылан, САССР спордун маастара буолбута.

Үөһээ Бүлүү улууһун хас да төгүллээх чемпиона уонна призера, Василий Степанов-Буучугурас, Владимир Андросов, Бөҕө Тараҕай турнирдарын, ССРС үтүөлээх тренерэ Д.П. Коркин 70 сылыгар аналлаах турнир кыайыылааҕа.