Данил Егорович 1959 с. бэс ыйын 17 к. Боотулуу нэһилиэгэр төрөөбүтэ, кыра эрдэҕиттэн көҥүл тустуунан дьарыктаммыта, Нам орто оскуолатыгар биллиилээх тустуук Н.П. Корякиҥҥа эрчиллибитэ. Орто оскуоланы бүтэрэн баран Украинаҕа Днепропетровскай куоракка физкультура институтугар үөрэнэр, манна көҥүл тустуунан дьарыктанар, ССРС спордун маастарын нуорматын толорон баран докумуонун ылбакка хаалар, кини үчүгэй маастар таһымыгар тустара. 17 саастааҕар көҥүл тустууга оҕолорго Минпрос ыытар күрэхтэһиитигэр Саха сирин чемпиона буолар, онтон Саха сирин хамаандатын састаабыгар киирсэн Уһук Илиҥҥи зона оҕолорго күрэхтэһиитигэр чемпион буолбута, ити Үөһээ Бүлүү уолаттарыттан бастакы улахан ситиһии этэ.

         Данил оҕо эрдэҕиттэн бэркэ хапсаҕайдыыра, сытыы бырахсыылаах, кимэн, бултаһан тустар тустуулаах бөҕөс этэ. Үөһээ Бүлүү ыһыахтарыгар өрүү бастыыра, өссө биир сыл абсолютнай чемпион буолбута. Данил тустар кэмигэр Үөһээ Бүлүү ыһыаҕар ылбычча чемпион буолбаккын, тэҥ баайыылаах бөҕөс элбэҕэ бэрт. Данил бу тустуу финалыгар спорт маастара, республикаҕа ыарахан ыйааһыҥҥа бастыы сылдьыбыт Олег Иванову охторбута. Данил итини таһынан Буучугурас бирииһин хас да төгүл кыайбыта, миэстэлэспитэ, саамай улахан ситиһиитинэн Бүлүүгэ буолбут 1985 с. Манчаары Спартакиадатыгар 60 кг ыйааһыннаахтарга чемпионнаабыта буолбута. Данил ыйааһыны сатаан үүрэрэ уонна тустуон иннинэ үчүгэйдик бэлэмнэнэрэ, хапсаҕай улахан маастара этэ. 

         Данил Егорович 2006 с. олох эдэр сааһыгар ыарахан ыарыыттан олохтон барбыта.