Айхал Ороһуга 1993 с. төрөөбүтэ. Икки тустуунан тэҥҥэ дьарыктаммыта, маҥнай СР үөрэҕириитин туйгуна И.Г. Кысылбаиковка дьарыктаммыта, онтон оҕо спортивнай оскуолатыгар дьарыктанан баран 2007 с. ДЮСШ-5 Дьокуускайга эрчиллэ тиийбитэ. Кинини В.В. Уйгуров, В.Е. Стручков дьарыктаабыттара. Үөһээ Бүлүүгэ эрчиллэр кэмигэр С.А. Жендринскэй, В.В. Литвинов дьарыктаабыттара. Бастакы күрэхтэһиитэ 9 саастааҕар  26 кг бырааттыы Александровтар бириистэригэр III м ылбыта, көҥүл тустууга. 2006 с. олимпийскай чемпион П. Пинигин бирииһигэр III м ылар. 2008 с. Хабаровскай куоракка Федеральнай округ уолаттарга күрэхтэһиитигэр III м буолар. 2013 с. эдэрдэргэ Федеральнай округка II м ылар. Кини 66 кг ыйааһыннаахтарга бу кэмҥэ тустара.

         Билигин Айхал РФ көҥүл тустууга маастарга кандидата. Айхал 2011 с. университет физкультурнай отделениетыгар үөрэнэ киирэр уонна 2015 с. кыһыл дипломунан бүтэрбитэ. Ити үөрэнэр кэмигэр кэтэхтэн юридическай факультетка үөрэнэн 2015 с. бүтэрбитэ. Итини таһынан 2015 с. тустуу тренерин дириҥэтэн үөрэтэр магистратураҕа үөрэнэ киирбитэ уонна быйыл 2017 с. үөрэнэн бүтэриэхтээх. Онон 24 саастаах эдэр киһи 3 үрдүк үөрэхтэниэхтээх.

         Айхал кыра эрдэҕиттэн хапсаҕай тустууну сөбүлүүрэ уонна элбэхтик күрэхтэспитэ. Сөбүгэр албастардаах, кимэн киирэр стиллээх бөҕөс, арай күүс өттүнэн утарсааччыларыгар сабырыйтарар курдук. Бу боппуруоска үлэлэһиэн наада. Билигин Айхал эдэр, онон физически эбиллиэн сөп, күүс эбилиннэҕинэ тустуута өссө тупсуон сөп этэ.

         Айхал Эрчимэн Бэргэн куоталаһыытыгар үс сыл тустубута уонна 2010, 2011 сс. чемпион буолбута, 2008 с. II м ылбыта. 2009 с. Үөһээ Бүлүү хамаандатын кытта Федерация Кубогын хаһаайына. Эдэрдэр ортолоругар хапсаҕай тустууга Манчаары аатынан спорт национальнай көрүҥнэрин сайыннарар киин кубогын хаһаайына. 2012, 2013 сс. Григорий Попов бирииһигэр республиканскай турнир чемпиона, 2013 с. Н.К. Докторов-Бычырдаан бирииһигэр тустууга III м ылар, Буучугурас бирииһин республиканскай турнирын II призера.