Афанасий Поликарпович 1931 с. тохсунньу 4 к. Үөһээ Бүлүү оройуонун Кэнтик нэһилиэгэр төрөөбүтэ. Үрдүк үөрэхтээх, 40-тан тахса сыл учууталынан үлэлээбитэ. РСФСР норуотун үөрэҕириитин туйгуна, Саха АССР оскуолаларын үтүөлээх учуутала, Саха АССР спордун маастара.

Манчаары бирииһин иһин спартакиада олохтоммута быйыл 49 сылын туолар. 1968 с., бэс ыйыгар Дьокуускай куораттааҕы культура уонна сынньалаҥ пааркатыгар Манчаары Баһылай Спартакиадатыгар республика 13 оройуоннарыттан 253 спортсмен, ССРС уонна Саха АССР 23 маастардара кыттыбыттара.

Манчаары бастакы Спартакиадатыгар Үөһээ Бүлүү оройуонун хамаандата кыайыыны ситиспитэ уонна курустаал кубогы илдьэ кэлбитэ. Оттон ыла 49 сыл ааста. Күн-дьыл ааһан истэҕин аайы Үөһээ Бүлүү бу дьоһун кыайыыта өссө киэркэйэн күндүтүйэн иһэр. Үөһээ Бүлүүттэн 23 киһи бу бастакы спартакиадаҕа кыттыбыта, ол иһигэр 16 киһи тустубута. Хапсаҕайдаһан тустууга Үөһээ Бүлүү бастаабыта. 35-тэн үөһэ саастаах ветераннарга Үөһээ Бүлүүттэн 70 кг Афанасий Мачахов чаҕылхайдык бастаабыта. Кини ол кэмҥэ Үөһээ Бүлүү оскуолатыгар математика учууталынан үлэлиирэ. Кэнтиккэ 1970 с. оскуола саҥа дьиэтэ тутуллан үлэҕэ киирбитэ, онно 1970-1973 сс. директорынан үлэлээбитэ.

1971 с. Дьокуускайга буолбут Манчаары үһүс Спартакиадатыгар 35-тэн үөһэ саастаах ветераннарга 70 кг Афанасий Мачахов эмиэ бастаабыта.

Афанасий Поликарпович оскуолаҕа кабинетнай системанан үөрэтиигэ, автоматизированнай кылааһы киллэриигэ опыты тарҕатар тирэх пууну тэрийбитэ, кини дьарыктаабыт оҕолоро математикаҕа, физикаҕа республиканскай куоталаһыыларга 1-2 миэстэлэри ылаттаабыттара.

Афанасий Поликарпович Кэнтик нэһилиэгэр тимир ууһаарытын историятын үөрэтэр “Чап уустара” музейы төрүттээбитэ, директорынан үлэлээбитэ.