Михаил Петрович 1927 с. балаҕан ыйын 13 к. Тамалакааҥҥа төрөөбүт, өссө маҥнайгы араспаанньалара Даниловтар диэн эбитэ. Бүлүүгэ педучилищены үөрэнэн бүтэрбит, манна кини А. Федоровы, С. Ли-Фу-ну, А. Даниловы кытта бииргэ үөрэммитэ үһү. Михаил Малардыров спорт элбэх көрүҥүнэн дьарыктаммыт эбит. Ол курдук хапсаҕайга САССР спордун маастара, олох үчүгэйдик волейбол оонньуура, велосипеды тэбэрэ.

         1952 с. Саха сирин профсоюзтарын Спартакиадатыгар велосипедынан 25 км куоталаһан бастаабыта, волейбол оонньуутугар учууталлар хамаандаларыттан кыттан эмиэ чемпионнуур. 1954 с. Малардыров ыйааһына суох, эргиир систематынан тустан Хаҥалас хамаандатыттан тустубут Илья Кондратьев кэнниттэн С. Ли-Фу-луун II, III м, 1955 с. 70 кг дылы тустан II м ылар. Дьон-сэргэ ити күрэхтэһиигэ көрдөрүүлээх тустууга Ньурба бөҕөһө Вл. Ефремовтыын тустубутун уос номоҕо оҥостон кэпсииллэр. Ол курдук Үөһээ Бүлүү бөҕөһө туох да бокуойа суох Ефремов атаҕар түһэр, ону Владимир умса табыйбытыгар Михаил Малардыров салгыҥҥа эргийээт, тура түһэр. Бу түгэн тустууга соччо көстүбэт көстүү. Михаил Петрович чахчы кыанар киһи буоларын уонна акробатиканан дьарыктаммытын туоһута буолар.

         1956 с. Михаил Малардыров САССР куоталаһыытыгар III м ылар, 1957 с. республика чемпиона буолар. Кини хоппут дьонун истэригэр Ким Марков (Хаҥалас), Иван Григорьев, С. Ли-Фу, Вл. Тимофеев (үһүөн Үөһээ Бүлүүлэр) бөҕөстөрө бааллар уонна атын улуустары чугаһаппакка пьедестал үс үктэлин бэйэлэрэ эрэ ылаллар. Чемпион — Михаил Малардыров. Ити сыл Михаил Петрович тренердэр оскуолаларыгар үөрэнэ Ленинград куоракка барар. Михаил Петрович өр кэмҥэ И. Барахов аатынан орто оскуолаҕа физругунан үлэлиир, улуус саамай улахан оскуолатын үөрэнээччилэрин өй-санаа, күүс-уох өттүнэн үүнэн-сайдан тахсалларыгар күүһүн харыстаабакка үлэлиир.

         Михаил Малардыров дьиэ кэргэнэ улахан, уонча оҕо көрүүтэ-истиитэ, аһа-таҥаһа элбэх үбү-харчыны, түбүгү эрэйэрэ. Ону Михаил Петрович кэргэнэ Мария Васильевна сөптөөхтүк тэрийэн-дьаһайан киһи оҥортообута, улаатан ситэн-хотон дьон киэнэ талыылара буолбуттара. Олортон аҕаларын суолун тутуһан Петр, Антон Малардыровтар көҥүл тустуунан дьарыктанан ССРС спордун маастардара буолбуттара. Петр Россия 2 төгүллээх чемпиона, Антон ССРС Сэбилэниилээх Күүстэрин чемпиона буолбуттара. Михаил Петрович хоту улууска баран идэтинэн үлэлээбитэ, хоту дьону кытта алтыһан бултаабыта-балыктаабыта. Ол да сылдьан оҕолорун үөрэх-билии кыһатыгар Үөһээ Бүлүүтээҕи Михаил Алексеев аатынан гимназияҕа ыытан 2 уолун үөрэттэрбитэ. Уолаттар тустуунан дьарыктаммыттара, үөрэҕинэн ылсыбыттара уонна барытыгар ситиһиилээх буолбуттара. Михаил Малардыровы төрөөбүт дойдутугар Тамалакаан нэһилиэгэр умнубаттар. Арочнай зал тутан баран М. Малардыров аатын иҥэрбиттэрэ, кини аатынан хапсаҕай түһүлгэтин тэрийэ сылдьыбыттара, ону сөргүтүөххэ баара.