Тимофей Мойтохонов Үөһээ Бүлүү улууһун биир бастыҥ хапсаҕайдьыта этэ. Ол курдук 21 сааһыгар Саха АССР спордун маастара буолбута. Хапсаҕай тустуу үгүс албастарын баһылаабыт бөҕөс, ордук Валерий Федоров курдук халбарыйыылары, умса тардыылары, атахтааһыны табыллан оҥороро, тустар ыйааһыныгар уҥуоҕунан үрдүк буолан атахтаттаҕына да охтубат этэ, утарсааччыларыттан ордуга диэн сүрдээх түргэн хамсаныылаах, бокуойа суох кимэн, бултаһан тустара. Оҕо сылдьан спорт элбэх көрүҥүнэн дьарыктаммыта, ол эрэн хапсаҕай тустууну ордорон күүскэ ылсыспыт. Тима 5-6 сыл күүскэ тустубута, ол курдук 1986 с. 18 сааһыгар Павел Пинигин республикатааҕы турнирын кыайбыта. Олимпийскай чемпион турнира бу кэмҥэ Саха сиригэр саамай улахан турнир этэ. Тимофей бу турнирга Саха сирин биллиилээх бөҕөстөрүн Василий Гоголевы, Василий Тартакыновы, Дмитрий Дмитриевы охтортообута. Бу ситиһиитинэн кынаттанан оройуон күүстээх бөҕөһө буолбута. Итинтэн сиэттэрэн Н.К. Докторов-Бычырдаан бирииһин 1989 с., Буучугурас бирииһин 1992 с. чемпиона буолбута. Саха АССР чемпионатыгар  1989 с. II м, 1990 с. I м ылаттаабыта.

         Тимофей Филиппович 1968 с. Өргүөт нэһилиэгэр төрөөбүтэ, идэтинэн шофер этэ, сүрдээх элбэх кэлиилээх-барыылаах таһаҕас массыынатыгар үлэлээбитэ. “Өргүөт” совхоз саҥа тэриллэн үлэ-хамнас элбэҕэ, ордук сүөһү эбии аһылыгын уотурбаны, бурдугу таһыы элбэҕэ уонна оччолорго таһаҕас үксэ “Золотинка” станцияттан таһыллара, суоппардар хастыы да нэдиэлэ устата баран кэлэллэрэ. Тимофей “Өргүөт” совхоз бастыҥ шофера буолбута, оччолорго эдэр үлэһиккэ саамай улахан наҕараадалары “Пятилетка ударнига”, “Социалистическай куоталаһыы кыайыылааҕа” диэн знактары үөрүүлээхтик туттарбыттара. Үлэ быыһыгар үчүгэй дьарыга-эрчиллиитэ суох тустара, ол эрэн тустар баҕата улахан буолан уонна хапсаҕай тустууну балачча баһылаабыт бөҕөс, айылҕаттан тустарга бэриһиннэрбит буолан күрэхтэһиилэргэ кыайыылаах тахсара. Тустарыгар албастарын эҥкилэ суох үчүгэйдик оҥортуура, Бүлүү сүнньүгэр 53, 55 кг ыйааһыннаахтарга адьас кимиэхэ да хотторбот этэ. Ньурба, Сунтаар, Бүлүү бөҕөстөрүн киһилэтэлээбэтэ. Үөһээ Бүлүүгэ Василий Тартакынов, Савва Огочонов, Гаврил Тимофеев, Дмитрий Дмитриев, Алексей Шамаев тэҥҥэ сыһа киирсэллэрэ, ол иһин да буолуо, бу уолаттар бары спорт маастара буолбуттара. Бастыҥнара Василий Тартакынов, Дмитрий Дмитриев Саха АССР чемпионнара буолбуттара.

         Тимофей Мойтохонов Саха Республикатыгар табыллан тустубут икки сылыгар, ол эбэтэр 1989, 1990 сс. Үөһээ Бүлүү бастыҥ спортсменын аатын сүкпүтэ. Саха сиригэр хапсаҕай тустууну киэҥник тэрийэр, Саха хапсаҕайын аан дойдуга таһаарар туһугар күүскэ үлэлэһэр Алексей Егорович Мостахов биир этиитигэр: “Үөһээ Бүлүү аатырбыт хапсаҕайдьыта Тимофей Мойтохонов оҥорор-туттар албастара дьиҥнээх сахалыы албастар, хапсаҕайдьыттар Мойтохонов курдук тусталларыгар баҕарыам этэ” — диэбитэ да Тимофей тустуутун туһунан элбэҕи этэр, үтүө өйдөбүлү хаалларар. Үөһээ Бүлүүгэ хапсаҕайдьыт элбэх, албастары да элбэхтик тутталлар, ол эрэн Мостахов Мойтохонову чорботон эппитэ бу үрдүк сыанабыл.