Илья Семенович Мордовской хапсаҕай тустууну ситэ-хото баһылаабыт Үөһээ-Бүлүү биир улахан маастара. Ол курдук кини Саха сирин чемпионаттарыгар Ньурбаҕа 2009, 2012 сс., Үөһээ-Бүлүүгэ I миэстэлэри ылаттаабыта, итини таһынан Бүлүү куоратыгар эдэрдэргэ 70 кг III миэстэ, Чурапчыга 80 кг ветераннарга II миэстэни ылбыта. Илья Үөһээ Бүлүү хамаандатын саатаабыгар киирэн 2009 с. Үөһээ-Бүлүүгэ, 2013, 2014 сс. Дьокуускай куоракка Саха Республикатын хапсаҕай тустууга Федерациятын кубогын хаһаайына. 2008 с. ыытыллыбыт Манчаары XVIII Спартакиадатыгар Бүлүү куоратыгар чемпион үрдүк аатын ылбыта. Илья Мордовской Саха сирин чемпионун аатын 70 уонна 80 кг ыйааһыннарга ылаттаабыта. Саха сирин чулуу бөҕөстөрө Василий Стручков, Михаил Тихонов, Станислав Афанасьев, Владимир Быкалыров тустар кэмнэригэр бу бөҕөстөрү кытта тэҥҥэ эриһэрэ, сорох кэмҥэ кинилэр иннилэригэр да түһэрэ. Илья Мордовской чочуллубут албастардаах тустуук, элбэх албаһы туттар, атахха киирэр, умса тардыылары, тиэрэ анньыылары, албын хамсаныылары, илииттэн ылан туора охсуулары оҥорор, атаҕынан тэбэн, олуйан бэркэ туттар. Мордовской тустуутун чуолкай былааннаан тустар, илиитигэр балачча күүстээх буолан, наада тирээтэҕинэ үчүгэйдик көмүскэнэр.

Илья Семенович идэтинэн учуутал, үрдүк физкультурнай үөрэхтээх, Дүллүкү оскуолатыгар элбэх сыл учууталынан үлэлээтэ, Саха Республикатын үөрэҕириитин туйгуна. Маҥнай үлэтин быыһыгар, онтон штат көрүллэн оҕолору көҥүл, хапсаҕай тустууга эрчийбитэ, билигин босхоломмут тустуу тренерэ. Эрчийбит оҕолоруттан Саха сирин аатырбыт бөҕөһө Н. Семенов, спорт маастарын нуорматын толорбут Руслан Николаев, Дьулус Тарасов, ветеран бөҕөс М. Бочетов таҕыстылар, билигин дьарыктыыр оҕолоро сотору кэминэн үчүгэй тустуулаах бөҕөс буолалларыгар эрэнэбит.

Илья Мордовской 1968 сыл балаҕан ыйын 11 күнүгэр Тамалакааҥҥа төрөөбүтэ, Үөһээ-Бүлүүгэ улааппыта, үөрэммитэ, орто оскуоланы Уус-Алдан улууһугар Сыырдаах оскуолатыгар бүтэрбитэ. Көҥүл тустууга үтүөлээх тренер  Н.Н. Константиновка эрчиллибитэ, ССРС спордун маастарыгар кандидат, «Трудовые резервы» общество Киин Сэбиэтин чемпиона, Армияҕа сулууспалыыр кэмигэр 339 Армия чемпиона, Бүлүү зонатын, Үөһээ-Бүлүү улууһун чемпиона. Бииргэ төрөөбүт бырааттара Виталий, Михаил тустууктар. Михаил СССР спордун маастара. Онон Мордовскойдарга тустуу удьуордаан баар.