Аскалон Үөһээ Бүлүү улууһун Нам нэһилиэгэр 1956 с. сэтинньи 21 к. төрөөбүтэ.

         Саха сирин уһулуччулаах тренеригэр Дмитрий Петрович Коркиҥҥа эрчиллэн Чурапчытааҕа спортивнай оскуоланы ситиһиилээхтик үөрэнэн бүтэрбитэ. Көҥүл тустууга ССРС спордун маастара, хапсаҕайга САССР спордун маастара.

         Аскалон Данилович Балаҕаннаахха биригэдьииринэн үлэлиир кэмигэр үс секциялаах спортивнай сааланы бэйэлэрин күүстэринэн тутарга, сорох дьон санаатыгар туолбат, хорсун былааны ылыммыттара. Үлэһит илии биригээдэтэ үлэ чааһын кэннэ киэһэ 9-10 чаастан, халлаан хараҥарыар диэри үлэлээбиттэрэ. 4 км сиргэ турар эргэ ыскылааты ыспыттара, бөһүөлэккэ көһөрөн аҕалбыттара. Онон 10х8 м иэннээх сүүнэ дьиэни элбэх сыранан билэрдиин-билбэттиин бары сүбэлэрин холбоон тутан барбыттара. Эдэр уолаттар бэйэлэрин харчыларыгар кыттыһан туттар тээбириннэрин — “Дружба” эрбиини, электрическэй сверлону атыыласпыттара. Бастакы саҕалааһыннарын “кыаллыбат, ыарахан, матырыйаал көстүбэт” диэн иҥнибэккэ, утуйар ууларын да умнан туран, тиһэҕэр тиэрдибиттэрэ. Алтынньы ыйыгар саалаларын холлоҕоһун бүтэрэн, үрдүн саппыттара. Кинилэр итинник үлэ чааһын кэннэ үлэлээн спортивнай сааланы тутан, оройуон үрдүнэн үтүөкэн бачыымы көтөхтүлэр. Уолаттар эһиил саас саалаларын ситэрэн, эбии баанньык уонна душ тутан киллэрэр былааннаммыттара туолбута.

Аскалон Данилович үөрэнэ сылдьан РСФСР хаһаайыстыбыннай вузтарын күрэхтэһиитигэр хас да төгүллээх призера буолбута, “Спартак” общество Киин Сэбиэтин күрэхтэһиитигэр III миэстэни ылбыта, 1978 с. ССРС тыа хаһаайыстыбатын вузтарын күрэхтэһиитигэр III призер буолбута.  Ити сыл көҥүл тустууга ССРС спордун маастарын аатын сүкпүтэ.

         Аскалон Данилович 1983 с. Буучугурас бирииһин 60 кг чемпиона, 1983 с. Манчаары Баһылай IX Спартакиадатын 60 кг чемпиона, 1986 с. Буучугурас бирииһин иһин абсолютнай чемпиона.

Аскалон Данилович элбэхтик эрчиллэн, үгүстүк үлэлээн, сыал-сорук оҥостон элбэҕи ситиспит биллиилээх спортсмен, икки тустууга спорт маастара буолбута.

         Аскалон хапсаҕайынан Красноярскайга үөрэнэн кэлэн баран олохтоон тустубута. Маҥнайгы тустуутугар бастаабатаҕа, дьиҥ сахалыы тустуулаах уолаттарга ыарырҕаппыта. Талааннаах уол хапсаҕай албастарын үөрэтэн  1983 с. Буучугурас бирииһин кыайбыта, 1986 с. XXII Буучугурас бирииһин абсолютнай чемпиона буолбута. Маны таһынан буряттар тустууларыгар Сибиир уонна Уһук Илин чемпиона буолбута, ону таһынан Саха сиригэр чемпион буолуталаабыта. Хапсаҕай тустуу албастарын баһылаабыт бөҕөс, олох үчүгэйдик атах иһинэн-таһынан тэбэр, олуйар уонна атахтаттаҕына охтубат, атаҕар үчүгэйдик турар, утары бырахсар, өссө үксүгэр хотуулаах тахсар.