Михаил Николаев төрүт Харбалаах ыччата этэ. Аҕата Ким Иванович, ийэтэ Анна Михайловна ханна да халбарыйбакка Харбалаахха олорбуттара. Колхоз, совхоз үлэтигэр күүстэрин харыстаабакка Анна Михайловна ыанньыксытынан, аҕалара Ким Иванович булчут, сылгыһыт үлэтигэр үлэлээбиттэрэ. Миша оскуолаҕа да сылдьан, хойут да сайын аайы оттуура, дьонугар көмөлөһөрө. Николаевтар 12 оҕолоох ыаллар, наардаабыт курдук 6 уол, 6 кыыс. Миша бэһис оҕо этэ.

         Миша кыра эрдэҕиттэн бэйэтин кыанар, сытыы-сымса уол этэ. Онон да буолуо атаҕынан, хайыһарынан бэрткэ сүүрэрэ, ордук сөбүлээбит көрүҥэ тустуу этэ. Кини көҥүл тустууга да бэрткэ тустара, маастарга кандидат этэ. Михаил Николаев РФ Сэбилэниилээх күүстэригэр бэрткэ сулууспалаабыта, 22452 №-дээх байыаннай чаас хамандыыра полковник А. Бучков Махтал суругунан наҕараадаламмыта. Сулууспа кэнниттэн Нам улууһун педучилищетын физкультурнай отделениетыгар үөрэнэ киирэр. Манна хапсаҕайынан дьаныһан дьарыктанар. Үөһээ Бүлүү улууһун хамаандатыгар киирэн 1995 с. Төҥүлүгэ XVI Манчаары Спартакиадатыгар 70 кг тустан III м ылар, 1997 с. Ньурбаҕа XV Спартакиадаҕа II м ылар. Улууһугар ыытыллар тустууларга Е. Прокопьев бирииһигэр, Түргэн Бөҕө бирииһигэр, Н.К. Докторов-Бычырдаан, Буучугурас бирииһигэр чаҕылхайдык кыайталыыр, 1996 с. көҥүл тустууга 68 кг Бүлүү зонатын чемпиона буолар. Ити сыл көҥүл тустуу Саха сиригэр төрүттэммитэ 40 сылыгар аналлаах тустууга I м ылар. 1996 с. Чөҥкөй бирииһигэр абсолютнай чемпион буолар. Бу кэмҥэ “Өбүгэлэр оонньуулара” сонун куоталаһыы Дьокуускай куоракка тэриллэр, онно тутум эргииргэ кыттан 105 төгүл эргийэн СР чемпиона буолар уонна рекорд олохтуур. Миша 1997-1998 сс. П. Алексеев бирииһигэр 70 кг II м ылаттыыр. Бу куоталаһыыга аатырбыт хапсаҕайдьыттар А. Яковлев (Уус-Алдан), П. Алексеев (Үөһээ Бүлүү) бөҕөстөрө иннигэр түһэллэр, манна Михаил сиппит-хоппут бөҕөс буолбута көстүбүтэ. Бу кэмҥэ Михаил Николаев СР спордун маастара буолбутун туоһулуур дастабырыанньа уонна түөскэ кэтиллэр знак туттарыллар. 1997 с. Бүлүү бөлөх улуустарын үөрэҕириитин систематыгар ыытыллар Спартакиадаҕа уонна Олимпийскай оонньуулар тэриллибиттэрэ 100 сыллаах юбилейыгар анаммыт тэрээһиҥҥэ кыттан 75 кг ыйааһыннаахтарга I м ылар.

         Саха Республикатын хамаандатыгар киирэн 1997 с. Усть-Орта куоракка Сибиир уонна Уһук Илин норуоттарын Спартакиадатыгар 74 кг хуреш тустууга III м ылар. Бүлүү куоратыгар ол кэмҥэ ыытыллар республика хапсаҕайга турнирыгар, В.Г. Румянцев бирииһигэр үс сыл субуруччу чаҕылхайдык тустан бастаталыыр. Бу ситиһиилэрин иһин СР хапсаҕайга Федерациятын Махтал суругунан наҕараадаланар. И. Барахов төрөөбүтэ 100 сыллаах юбилейыгар төрөөбүт дойдутун Харбалааҕын ыһыаҕар чаҕылхай тустууну көрдөрөн дьонун-сэргэтин үөрдэр, бу улахан тэрээһиҥҥэ туста кэлбит үгүс ааттаах-суоллаах бөҕөстөрү охтортоон чемпион буолар.

         1999 с. Михаил Николаев бүтэһигин кулун тутар 27-28 кк. Буучугурас бирииһигэр I м ылар. Бу тустууга Миша хапсаҕай тустуу араас албастарын туттан утарсааччыларын үөс-батааска биэрбэккэ кыайталыыр уонна улууска 70 кг бастыҥ бөҕөс буолбутун көрдөрөр, онтон аҕыйах хонон баран тустууттан, олохтон букатыннаахтык барбыта.