Руслан 1983 с. Далыр Күүлэтигэр төрөөбүтэ. Кырдьык да Руслан Николаев Нам оскуолатын 10 кылааһыгар үөрэнэ сылдьан 1999 с. П.Е. Алексеев 60 сааһыгар, кини сырдык кэриэһигэр анаммыт чемпионатка 25 бөҕөстөн III м ылбыта. 17 саастаах оҕо киһиэхэ бу соһуччу ситиһии этэ. Бу улахан түһүлгэҕэ республика күүстээх бөҕөстөрө үгүстэрэ бааллара. Кини иннигэр В. Торговкин (Бүлүү), Андрей Горбатов (Ньурба) эрэ түспүттэрэ. Руслан бу тустууга олох үчүгэйдик тустубута. Кимтэн да чаҕыйбакка харса суох тустубута. 7 эргиир тустубута, 5 бөҕөһү хоппута, онно үксүн атахха киирэн охтортообута. Чэ баҕар буоллун, атахха киирдин, онтон атаҕыттан ылан баран охторуохха наада, бу 17 саастаах оҕо киһиэхэ уустук, ону Руслан уустугурда барбатаҕа, олох үчүгэйдик атахтарын ороон ылан охтортообута. Инньэ гынан 55-62 кг ыйааһыннаах Саха сирин күүстээх хапсаҕайдьыттарын ортолоругар буурҕа курдук эмискэ баар буола түспүтэ. Кинини атахха киирэн охторорго маҥнайгы тренерэ Далырга Н.Н. Софронов, онтон салгыы Намҥа ССРС, САССР спордун маастара А.Д. Николаев үөрэппитэ. Үөрэҕи бэркэ ылыммыт Руслан, ити тустуутун кэннэ сотору буолаат Буучугурас, Бычырдаан, Ли-Фу бириистэригэр миэстэлэһэн барбыта. Республикаҕа миэстэлэһэн баран бэс ыйыгар Олоҥхо оонньууларыгар уолаттарга 55 кг ыйааһыннаахтарга Ытык Күөлгэ III м ылбыта, кини иннигэр Платон Саввинов (Үөһээ Бүлүү), Стас Никифоров (Хаҥалас) эрэ түспүттэрэ. Руслан СГУ хамаандатыттан тустубута.

         2000 с. Руслан Николаев Владимир Ефремов бирииһин кыайар. Ити түмүгүнэн 19 саастааҕар СР спордун маастарын нуорматын толорор. 2002 с. Н.К. Докторов-Бычырдаан бирииһин кыайар, В. Степанов-Буучугурас бирииһин мэтээллэрин толору кавалера, 2003 с. Хаандыгаҕа СР норуоттарын III спортивнай оонньууларыгар 62 кг ыйааһыннаахтарга II м ылар. Дьокуускай куоракка үөрэнэр кэмигэр столица хамаандатын састаабыгар киирэн 2002-2003 сс. хапсаҕай Федерациятын кубогын хаһаайына буолар. Руслан ыйааһына сотору үрдээбитэ, онон тустар сааһыгар сылдьан тустарын аҕыйатан барбыта. Руслан Русланович хапсаҕай тустууга хоннох аннынан киирэн көтөҕөн быраҕыыны, атахха киирэн охторууну лаппа баһылаабыт бөҕөс, бу хапсаҕай тустууга урут да, билигин да тахсыылаах-сууһарыылаах албастар, бу албастары лаппа үчүгэйдик баһылаан тустар кэмигэр Үөһээ Бүлүү хапсаҕайын оскуолатын биир бастыҥ иитиллээччитэ буолбута.