Моисей Обоев 1982 с. балаҕан ыйын 5 к. Ороһуга төрөөбүтэ. Ийэтэ Обоева (Таныкова) Лидия Семеновна, аҕата Валентин Обоев. Уол кыра эрдэҕиттэн спортка сыһыаннааҕын таба көрөннөр Үөһээ Бүлүүтээҕи оҕо спортивнай оскуолатыгар үөрэттэрэ киллэрэллэр уонна ССРС спордун маастара Н.Е. Афанасьевка эрчиттэрэ биэрэллэр. Моисей манна үөрэнэр кэмигэр Үөһээ Бүлүү оҕолорго чемпиона, көҥүл тустууга республика призера буолуталыыр. 1997 с. Россияҕа тустан ыйааһыныгар 4 м ылар, кыл-мүччү бириистээх миэстэттэн матар. 1995 с. И. Барахов аатынан орто оскуоланы үөрэнэн бүтэрэн, Чурапчы физкультурнай институтугар үөрэнэ киирэр. Институтка үөрэнэр кэмигэр тренер К.Н. Захаров салалтатынан эрчиллэн көҥүл тустууга РФ спордун маастарыгар кандидат буолар. Ол курдук 2001 с. улуу тренер Д.П. Коркин бирииһигэр II м ылар. Ити дьыл В. Андросов республиканскай турнирыгар 55 кг I м, 2003 с. Хаандыгаҕа Саха сирин норуоттарын III спортивнай оонньууларыгар 55 кг II м, 2003 с. М. Малардыров республикатааҕы турнирыгар II м ылаттыыр. Ити тустуулар түмүктэринэн СР спордун маастарын нуорматын толорор.