Савва Абрамович 1955 с. Сургуулук нэһилиэгэр төрөөбүтэ. 1973 с. Боотулуу орто оскуолатын бүтэрбитэ. 1978 с. Ермактааҕы физкультурнай техникуму үөрэнэн бүтэрбитэ. Техникумҥа үөрэнэр сылларыгар көҥүл тустуунан күүскэ дьарыктаммыта. Дьарыктанарга бэртээхэй усулуобуйа баар этэ: бэртээхэй спортзал, үрдүк квалификациялаах тренер, спордунан үлүһүйэн дьарыктанарга көҕүлүүр табаарыстар. Ити түмүгэр Савва Огочонов көҥүл тустууга ССРС спордун маастарыгар кандидат нуорматын толорбута.

1978 с. 2-с №-дээх Үөһээ Бүлүүтээҕи орто оскуолаҕа физкультура учууталынан үлэтин саҕалаабыта. Оччолорго физмат оскуолаҕа атын улуустартан элбэх оҕо кэлэн үөрэнэрэ. Кини физкультураҕа үөрэппит оҕолоруттан республикаҕа тиийэ биллэр спортсменнар, маастардар үүнэн тахсыбыттара. Ол курдук, Николаев Любомир Александрович хапсаҕайга уонна мас тардыһыытыгар СР спордун маастара, Саввинов Михаил Афанасьевич гиирэ спордугар Россия спордун маастара, эдэрдэргэ Аан дойду чемпиона буолбуттара. 

Савва Абрамович 57 киилэҕэ диэри ыйааһыҥҥа В. Румянцев, В. Ефремов, В. Степанов-Буучугурас бириистэрин кыайыылааҕа, элбэх улуустааҕы, зонатааҕы, республикатааҕы турнирдарга миэстэлэспитэ. Хапсаҕайга СР спордун маастара, көҥүл тустууга ССРС спордун маастарыгар кандидат, СР үөрэҕириитин туйгуна, РФ бүттүүн орто үөрэхтээһинин бочуоттаах үлэһитэ.