Арсентий Семенович 1949 с. олунньу ый 4 к. Нам нэһилиэгэр төрөөбүтэ.

Саха АССР спордун маастара, биллиилээх хапсаҕайдьыт. Арсентий 1966-1968 сс. Үөһээ Бүлүүгэ Н.П. Корякиҥҥа эрчиллибитэ. Оройуоҥҥа, Бүлүү зонатыгар ыарахан ыйааһыҥҥа хас да төгүллээх чемпион, призер буолбута. Республикаҕа Манчаары Спартакиадатыгар үс төгүл II миэстэ, 1987 с. хапсаҕайга I республика чемпионатыгар II миэстэ буолбута. 1986 с. Саха АССР спордун маастара буолбута.

Арсентий 1978-1983 сс. “Үөдүгэй” совхоз отделениетыгар биригэдьииринэн үлэлээбитэ. Быракааҥҥа бастакынан от охсуутугар чулуу дэкээдэһиттэр баар буолбуттара: Яковлев Николай Игнатьевич-Бөһөр Ньукулай бастакынан сезон устата 65 га сири охсон 1962 с. Кытай сиригэр күүлэйдиир путевканан наҕараадаламмыта. Кини охсуутун күтүөт Оконосов Арсентий Семенович 70-с сылларга хатылаабыта. Алта сыл сайын устата 70-80 галаах сири охсон республикаҕа тиийэ бастаталаабыта. Кини оттообут отунан нэһилиэк сүөһүтүн 3 ый устата аһаталлара. Хоннохтоох охсооччу ити бастыҥ үлэтинэн Чехословакияҕа күүлэйдээн кэлбитэ.

Арсентий аны биллиилээх бороон көрөөччүлэр М.С. Иванова, М.С. Алексеева салалталарынан эдэр сүөһүнү төлөһүтүүгэ оройуоҥҥа, республикаҕа социалистическай куоталаһыыга ыҥырыы таһааран бастакы күөҥҥэ тахсыбыта, от түмүгэр пятилетка гвардееһа диэн ааттаммыта. А. Оконосов, Х. Саввина, М.С. Иванова, М.С. Алексеева таһаарыылаах үлэлэрэ САССР Верховнай Советын Бочуотунай грамоталарынан, орденнарынан бэлиэтэммиттэрэ.