Кинини тоҕо ыраас хапсаҕайдьыт диэн ааттыыбытый? Кини тустарын оҕо эрдэҕиттэн көрөбүт уонна көбүөргэ тустар майгытынан итинник сыана быспыппыт. Кини хапсаҕайга көҥүл тустуу албастарын туттубат, ыраахтан тэйэ сылдьан тустар, стойката наһаа намыһаҕа суох, ол аата атаҕын үчүгэйдик көмүскэнэр. Түргэн-тарҕан туттуулаах бөҕөс, сүүрэ-көтө сылдьан тустар идэлээх. Оскуолаҕа сылдьан улахан дьону кытта тэбис-тэҥҥэ эриһэрэ уонна дьиҥ сахалыы тустуулаах Семен Тимофеевы кытта араа-бараа эриспиттэрэ. Тустарыгар туттар албастара атахха үчүгэйдик киирэрэ уонна охторон тэйэрэ, тобукка анньан умса ыыталыыра, ардыгар сыа тилэхтэриттэн ылан соһуталыыра, атаҕынан да бэркэ тэбэрэ уонна баһылаабыт албаһа умса халбарыйыы, умса тардыы, арыт атаҕын иһинэн тэбэн умса ыыталыыра, бу барылара холбоһон кыахтаах хапсаҕайдьыт буоларын туоһулуура. Ситиһиилэрэ да оннуктар. Манчаары Спартакиадатын XVII түһүлгэтигэр II миэстэлээх, П.Е. Алексеев бирииһин 2005 с. чемпиона, 2004 с. III м, 2007 с. II м, В. Румянцев бирииһин 2003 с. I м, 2006, 2007, 2009 сс. II м ылаттаабыта, “Хаҥалас хапсаҕайын” 2005 с. чемпиона, 2006 с. II м, И.И. Халдеев бирииһин 2010 с. боруонса, Бычырдаан, Вл. Ефремов бириистэрин кыайыылааҕа.

         Ыраас хапсаҕайдьыт Петр Осиповы оҕо эрдэҕинэ Маҥааска Иван Иннокентьевич Николаев тустууга эрчийбитэ, онтон оскуола кэнниттэн Бүлүү училищетыгар Петр Мартович Алексеевка эрчиллэн буһан-хатан тахсыбыта. Петр Осипов 1983 с. ахсынньы ый 19 к. Маҥааска төрөөбүтэ, аҕата Тылгыны нэһилиэгин киһитэ Василий Осипов, ийэтэ Маҥаас олохтооҕо Мария Григорьевна, бииргэ төрөөбүт быраата эмиэ хапсаҕай маастара, тустарын тухары Бүлүү улууһуттан тустубута. Петр Бүлүүнү үөрэнэн бүтэрэн баран учуутал идэтинэн Ньурба улууһун Хорула орто оскуолатыгар физкультура учууталынан үлэлиир. Үлэлии-үлэлии ХИФУ-га үөрэнэн, билигин үрдүк үөрэхтээх учуутал уонна оҕолору тустууга эрчийэр. Петр тустар кэмигэр Саха сирин биллиилээх бөҕөстөрүн, СР элбэх чемпионнарын, призердарын кытта илин-кэлин түһүстэ, ол курдук спорт маастардара, СР чемпионнара А. Павлов (Үөһээ Бүлүү), Семен Максимов (Мэҥэ), В. Торговкин (Мэҥэ), И. Друзьянов (Дьокуускай), С. Тимофеев, Ст. Родионов (Үөһээ Бүлүү) уо.д.а. аатырбыт бөҕөстөргө сүр баттаппакка араа-бараа тустара.