Юрий Дмитриевич Павлов олох эдэр эрдэҕиттэн оҕону иитиигэ үлэлээбитэ. Красноярскай куоракка орто анал физкультура учууталын үөрэҕин бүтэрэн, ССРС спордун көҥүл тустууга маастарыгар кандидат званиелаах эдэр киһини Кырыкый оскуолатыгар үлэҕэ анаабыттара. Кырыкый оскуолатыгар директорынан Федот Васильевич Ксенофонтов, онтон сельсовет председателинэн Егор Никитич Михайлов үлэлииллэрэ. Бу уопуттаах, дьоһуннаах салайааччылар эдэр ыаллары Юрий, Валентина Павловтары үөрүүннэн көрсүбүттэрэ, олохторун тэринэллэригэр оскуола, нэһилиэк иһинэн туох кыаллары барытын оҥорбуттара. Юрий, Валентина бу аҕа табаарыстарыгар билиҥҥэ дылы махтаналлар, сөптөөх үлэни-хамнаһы тэрийэн оҕолору кытта үлэлииргэ ыйан-кэрдэн биэрбиттэрин үтүө тылынан ахталлар. Ити 1980 сыллаахха этэ. Кырыкый нэһилиэгэр икки тустуу секцията тэҥинэн үлэлииллэрэ. Оскуола оҕолоро, эдэр уолаттар Юрий Павлов Кырыкыйга үлэлиирин тухары тустууннан дьарыктаммыттара. Оскуола оҕолоро көҥүл тустууга, хапсаҕайга оройуон үрдүнэн биллэн-көстөн барбыттара, эдэр уолаттар Буучугурас, Бычырдаан бириистэригэр миэстэлэһэр буолбуттара. Юрий Павлов бэйэтэ эмиэ элбэхтик күрэхтэһэрэ. Ол курдук Кырыкыйга тиийдэҕин сыл Докторов Н.К.-Бычырдаан бирииһин кыайбыта, эһиилигэр Буучугурас бирииһин иһин тустууга II миэстэни ылбыта. 1982 с. юбилейдаах оройуон ыһыаҕар Монголия Народнай Республикатын бөҕөстөрө кыттыылаах тустуу буолар, бу тустууга 55 кг ыйааһыннаахтарга Юрий кими да тулуппатаҕа. Бу тустууга улуус бастыҥнара бары кытталлар, ону таһынан Монголия чемпиона Батсайхан тустар, финалга Павлов монголу хотон бастыыр. Юрий Павлов тустар кэмигэр Кырыкыйга кэлин спорт маастардара буолбут Олег Иванов, Яков Егоров, Алексей Алексеев, Дмитрий Дмитриев бааллара, онтон арыый эдэрдэр Петр Дмитриев, Владимир Степанов оройуон, республика күүстээх бөҕөстөрө буолбуттара. Юрий Павлов 1986 с. буолбут Саха АССР чемпионатыгар II миэстэни ылар уонна Саха АССР спордун маастара буоларга баҕата күүһүрэр. Бу кэмҥэ оройуон спордун табаарыһа Аскалон Николаев салайара уонна улахан республиканскай турниры тэрийэр. Турнир П.П. Пинигин аатын сүгэр. Үөһээ Бүлүүлэр өтөр-наар көрбөтөх тустуулара буолар. Саха сирин ааттаахтара бары тиийэн кэлэллэр. Бэл аатырбыт бөҕөс, ССРС үтүөлээх маастара Василий Гоголев кытта кэлэр. Биһиги уолаттарбыт бу күрэхтэһиигэ ааттарын-суолларын түһэн биэрбэттэр. Биллиилээх бөҕөстөр истэригэр урут-хойут Саха сирин муҥутуур кыайыылаахтара буолбут Юрий Андреев, Максим Васильев, Петр Бурцев (Ньурбалар), Валерий Кэрэмээсэп, Борис Борисов, Василий Стручков (Дьокуускайдар) уо.д.а. бөҕөстөр кэлэллэр уонна икки күн устата Үөһээ Бүлүү ааттаахтарын кытта илин-кэлин түсүһэллэр. Бу тустууга Юрий Павлов, Клавдий Захаров, Ким Сергей, Василий Тартакынов, Савва Огочонов, Николай Григорьев дьоһуннаах тустууну көрдөрөн дьоннорун-сэргэлэрин үөрдэллэр. Юрий Павлов, Клавдий Захаров ыйааһыннарыгар бастыыллар уонна Саха АССР спордун маастардара буолаллар. Юрий  Павлов маастар буолан баран бу званиетын чиэстээхтик өрө тутан тустар. 1985 с. Буучугурас бирииһин иһин тустууга II миэстэни ылар, эмиэ бу дьыл республика чемпионатыгар III миэстэни  ылар, Бүлүү зонатыгар буолар тустууларга бастаталыыр, оройуон ыһыахтарыгар өрүү 60 кг ыйааһыннаахтарга бастыыр.

         Юрий Павлов отут сааһыгар дылы тахсыылаахтык тустан баран сыыйа тустуутун бытаардар уонна үлэ-хамнас үөһүгэр киирэн Кырыкый оҕолорун эт-хаан өттүнэн сайдалларыгар күүскэ турунан үлэлиир.  Үлэ түмүктээх буолар, оҕолор оройуон оскуолаларын куоталаһыытыгар бэйэлэрин бөлөхтөрүгэр өрүү бириистээх миэстэҕэ тахсаллар, бастыыллар. Оччотооҕу салалта эдэр киһини Кырыкый нэһилиэгэр сельсовет председателинэн үлэҕэ аныыллар. Юрий Дмитриевич бу үлэҕэ кыра кэмҥэ үлэлиир уонна: «Бу үлэ барсыбат эбит миэхэ, мин оҕону кытта үлэлииргэ сөптөөх эбиппин» — диэн быһаарынан үлэтиттэн уурайар уонна Быракааҥҥа оскуола директорынан ананан барар, Быракаан оскуолатыгар 10 сыл директорынан үлэлиир, үлэ эмиэ Кырыкыйга курдук тахсыылаахтык барар. Лоп курдук 10 сыл үлэлээбитин кэннэ Өргүөт орто оскуолатыгар директорынан үлэлэтэ көһөрөллөр уонна 2002 сылтан ханна да аралдьыйбакка 14-с сылын директорынан үлэлиир. Юрий Дмитриевич үлэлиир кэмигэр былаас уларыйар, үөрэхтээһин систематыгар эмиэ уларыйыы-тэлэрийии буолар. Элбэхтик үлэлэһэр директор, учуутал үлэтэ-хамнаһа тахсыылаах буолар кэмэ үөскүүр, ол эрэн үп-харчы куруук кырыымчык-татым буолар. Ону Юрий Павлов аахса барбат, элбэхтик туруорсар, үөрэх управлениетынан, үөрэх министерствотынан кэлэр-барар. Үлэтэ түмүктээх буолар, билигин Өргүөт оскуолата материальнай-техническай базата улууска биир бастыҥ. Оскуола ис-тас өттө ырааһа, сырдыга, оформлениета үчүгэйэ оҕо-аймах, учууталлар үлэлииллэригэр, үөрэнэллэригэр бэртээхэй эйгэни үөскэтэр. Юрий Дмитриевич өссө 1990 с. РСФСР үөрэҕириитин туйгуна знагынан наҕараадаланар.

         Юрий Дмитриевич олоҕун 34 сылын оҕону иитиигэ-үөрэтиигэ анаата, онтон 23 сыл устата директорынан айымньылаахтык үлэлээтэ. Бу усталаах туоратыгар ханна да тиийдин тустууну, спорду кытта үлэтин ситимниир. Бэл Быракааҥҥа, спорт сайдыбатах түбэтигэр үлэлэһэн мас тардыһыытын, гиирэ анньыытын күрэхтэһиилэрин тэрийбитэ, хомойуох иһин билигин ол туһунан бу нэһилиэккэ кэпсэтии да турбат быһыылаах. Өргүөт нэһилиэгэр кэлэн оҕолору тустууга эрчийэн үчүгэй тустууктар баар буолбуттара. Маны таһынан «Өргүөт бөҕөстөрө» хапсаҕай турнирын, онтон К. Захаров бирииһин, көҥүл тустууга ССРС спордун маастара Н. Иванов (Восьмой) бириистэрин оҕолорго тэрийбитэ, ааспыт сайын Өргүөккэ хапсаҕай тустуу Фестивалын тэрийбитэ, оройуон күүстээх бөҕөстөрө бары тиийбиттэрэ, күрэхтэһиитэ табыллыбыта. Өргүөт олохтоохторо бу тэрээһини сөбүлээбиттэрэ, директордарыгар Юрий Дмитриевичка махтаналлара улахан этэ.

         Юрий Павлов өр сыллаах дьаныардаах үлэтэ сөптөөхтүк сыаналанан Россия үөрэҕириитин туйгуна буолбута, «Дети Азии» фонда стипендиата, «Гражданскай килбиэн» знак кавалера (2007 с.), «Саха сиригэр спорт сайдыытыгар үтүөлэрин иһин» бэлиэ хаһаайына (2003 с.), Саха АССР спордун маастара (1988 с.), республиканскай категориялаах судьуйа (2015 с.).