Александр Трофимович 1956 с. атырдьах ыйын 25 к. Үөһээ Бүлүү оройуонун Нам нэһилиэгэр төрөөбүтэ.

         Саха сирин уһулуччулаах тренеригэр Дмитрий Петрович Коркиҥҥа эрчиллэн, Чурапчытааҕы спортивнай оскуоланы ситиһиилээхтик үөрэнэн бүтэрбитэ. Хапсаҕайдаһан тустууга Саха Республикатын спордун маастара, республикатааҕы турнирдарга элбэхтик чемпионнаабыт, миэстэлэспит бөҕөс, көҥүл тустууга ССРС спордун маастарыгар кандидат.

         Советскай Армия кэккэтигэр сулууспалаан, Ийэ дойдутугар ытык иэһин чиэстээхтик толорон кэлэн баран, эдэр эрчимнээх уол Исидор Барахов Барахов аатынан совхоз Балаҕаннаахтааҕы отделениетыгар “Уолаттар — фермаҕа” диэн ыҥырыыны бастакынан өйөөн, табаарыс уолаттарын кытта фермаҕа ыанньыксыттыы тахсыбыта, оройуон чемпион ыанньыксыта буолбута, “Кэскил” ыччат-комсомольскай звено салайааччыта этэ.

         Александр Трофимович Бурятскай АССР Иволгатааҕы тыа хаһаайыстыбатын техникумугар гидротехник идэтин ылбыта. Ол кэнниттэн төрөөбүт-үөскээбит Балаҕаннааҕар хонуу биригэдьииринэн, отделение управляющайынан таһаарыылаахтык үлэлээбитэ.

         1992 с. Балаҕаннаах туһунан нэһилиэк буолбутугар, нэһилиэк баһылыгынан 11 сыл кэскиллээхтик үлэлээбитэ.

         1994 с. Москватааҕы норуот хаһаайыстыбатын академиятын, 2006 с. кэтэхтэн Хабаровскайдааҕы государственнай уонна муниципальнай сулууспа академиятын ситиһиилээхтик үөрэнэн бүтэрбитэ.

         Александр Трофимович Саха АССР Үрдүкү Сэбиэтин Президиумун, ЫБСЛКС Киин Комитетын Бочуотунай грамоталарынан, “Молодой гвардеец пятилетки” о.д.а. анал бэлиэлэринэн хас да төгүл наҕараадаламмыта.

         Александр Трофимович дьоҥҥо-сэргэҕэ сүрдээх истиҥ, аламаҕай сыһыаннаах, оонньуулаах-күлүүлээх, үтүө суобастаах, инникини, киэҥи, кэскили кэрэһэлиир талааннаах салайааччы, бэйэтин чахчы кыанар, күүстээх спортсмен этэ. Саха киһитин сиэринэн иллэҥ кэмигэр айылҕалыын алтыһан, бултаан-балыктаан сынньанара, кэргэнинээн икки оҕолорун иитэн ньир-бааччы олорбуттара. Александр Трофимович 2007 с. соһуччу оһолго олохтон туораабыта.