Саха Республикатын хапсаҕайдаһан тустууга маастара Геннадий Юрьевич Прокопьев 1986 с. кулун тутар 31 к. Боотулууга Прокопьевтар дьиэ кэргэннэригэр төрөөбүтэ. Аҕата Юрий Семенович Прокопьев төрүт Боотулуу, Оноҕоччут нэһилиэгин Дьаархан аҕатын ууһуттан төрүттээх, ийэтэ Саввинова Тамара Тимофеевна Оҥхой нэһилиэгиттэн төрүттээх. Аҕатынан эһэтэ Прокопьев Сэмэн — сахалыы аата Бээлгээрэп Сэмэн, Боотулуу нэһилиэгин биллиилээх мас ууһа, 1960-1970-с сылларга нэһилиэк үгүс бөдөҥ тутууларын тутуспут хоһуун үлэһит киһи этэ.

Гена Боотулуу оскуолатын 5-с кылааһын бүтэрэн баран Үөһээ Бүлүүтээҕи оҕо спортивнай оскуолатыгар үөрэнэ киирбитэ. Бастакы тренердэрэ Н.Н. Гоголев, С.В. Жендринскэй буолаллар.

Геннадий 2003 с. Үөһээ Бүлүүтээҕи И. Барахов аатынан оскуоланы бүтэрэн баран, Чурапчытааҕы физкультура институтугар үөрэнэ киирбитэ. Үрдүк үөрэҕи бүтэрэн, тренер-преподаватель идэтин ылаат, төрөөбүт Боотулуутугар кэлэн, үөрэммит оскуолатыгар үлэлии сылдьан, армияҕа сулууспалыы барбыта. Армияттан кэлэн баран, Хороҕо тустуу тренеринэн үлэлээбитэ. Билигин Дьокуускай куоракка судебнай приставтар Департаменнарыгар үлэлиир. Кэлиҥҥи кэмҥэ хапсаҕай тустуутун таһынан, самбонан дьарыктанан кэккэ ситиһиилэрдээх. 2001 с. хапсаҕай аатырбыт маастара М.П. Малардыров брииһигэр турнирга — III м, 2002 с. олимпиец А.Н. Иванов бирииһигэр республика үөрэнээччилэрин 5-с спартакиадаларыгар — III м, 2005 с. ССРС призера Р.И. Цыпандин аатынан республиканскай турнирга — II м, 2006 с. В. Федотов бирииһигэр республиканскай турнирга — III м, 2007 с.  Дьааҥы аатырбыт бырааттыы тустууктарын Ноговицыннар бириистэрэ II м, 2009 с. В. Федотов бирииһигэр республиканскай турнирга  II м, 2010 с. көҥүл тустууга Россия үс төгүллээх чемпиона, ССРС спордун бочуоттаах маастара П.Е. Алексеев аатынан хапсаҕайга республика чемпионатын 70 кг дылы ыйааһыннаах бөҕөстөргө абсолютнай чемпиона буолар, 2011 с. Туймаада ыһыаҕын эмиэ ити ыйааһыҥҥа муҥутуур кыайыылааҕа буолар.

2013 с. Дьокуускай куоракка СР ИДьМ бирииһигэр хапсаҕайга улахан күрэх ыытыллыбыта, 70 кг 117 бөҕөс кыттыбытыттан ураты чаҕылхай тустууну көрдөрөн чемпион үрдүк аатын Боотулуу уола, хапсаҕайга СР спордун маастара Геннадий Прокопьев ылбыта.