Үөһээ Бүлүүгэ Аҕа дойду сэриҥгин кэнниттэн тустубут хапсаҕайдьыттартан бу күҥҥэ дылы киниэхэ тиийэр хапсаҕай маастара суоҕа буолуо. Ситиһиитэ да оннук уонна күүһэ-күдэҕэ, албаһа, бэйэтигэр эрэлэ, ааһан баран тас көрүҥэ да дьонтон таһыччы бөҕөс этэ. Дьон-сэргэ уонна тустууну билээччилэр кэпсииллэринэн Дьөгүөр тустар ньымата, утарсааччыларын күүстээх, мөлтөх өрүттэрин билэрэ, алҕастарын таба туһанан охтортуура киһиттэн эрэ ураты этэ диэн этэллэр, илиитин күүһүнээҕэр атаҕын күүһэ ордук буолуон сөп диэн сылыктыыллар, ол курдук олус бэркэ атаҕынан тэбэн тустара, аны атаҕыттан да ыллардаҕына, утары тэбэн куруук хотуулаах тахсара.

         Егор Прокопьев-Чөнкөй Дьөгүөр Саха АССР спордун маастара, Саха АССР хапсаҕайга үс төгүллээх чемпиона, Манчаары Спартакиадаларын 1968, 1969 сылларга 70 кг I м, 1977 с. VI Спартакиадаҕа 70 кг I м, 1967 с. Саха АССР норуоттарын спартакиадатын абсолютнай чемпиона. Маны таһынан Бүлүү  зонатын элбэх төгүллээх чемииона, 1965 с. тэриллибит Буучугурас бирииһин үс төгүллээх чемпиона уонна үс төгүллээх абсолютнай чемпиона. Биир киһи холугар тустууга сөҕүмэр ситиһии. Дьөгүөр түһүлгэҕэ адьас аҕыйахтык, биирдэ эмит охтубут эбэтэр тэҥнэспит буолуон сөп.        1968 с. I Манчаары Спартакиадатыгар 72 кг Үөһээ Бүлүү чиэһин көмүскээбитэ уонна I миэстэни ылбыта, бу тустуута икки хапсыһыыта дьон-сэргэ өйүгэр-санаатыгар хатанан хаалбыт.  Финал аҥаарыгар Ньурба бөҕөһүн, бэйэтиттэн лаппа эдэр саастаахспорт маастарын Владимир Николаевы кытта хабыр киирсиигэ тэҥнэспиттэрэ, үтарсааччыта сытыы киириилээх, күүстээх баҕайы киһи  этэ. Дьөгүөргэ куруук кимэн тустубута да, Дьөгүөр куоппатаҕа, тустуу иитин ортотугар эргийэн биэрэ-биэрэ хардары атаакалыыра, түгэн көһүннэҕинэ тэбэн көрөрө. Николаев онтон чаҕыйан харса суох түһүөлээбэт этэ, уон мүнүүтэлээх тустуу тэҥнэһиинэн бүппүтэ. Владимир Николаев онтон кэлин 80 кг ыйааһыҥҥа саҥардыы аатыран эрэр Максим Васильев иннигэр түһэн бастаабыттаах. Финалга Таатта бөҕөһө, Чурапчыттан тустубут 20 саастаах, ССРС тыатын сирин бөҕөстөрүн чемпиона Владимир Андросовтыын киирсибитэ. Кытаанах киирсии кэмигэр Дьөгүөр атаҕын биэрэн эрэрэ да Владимир Андросов хонууга тобуктаан олороро, Дьөгүөр атахха киирбитин тэбэн охторбут эбит. Оччолорго 20 саастаах, күөгэйэр күнүгэр сылдьар   Владимир Андросовка тоҕо атаҕын биэриэхтээҕин өйдөөбөтөҕүм, таах истэн эрэ кэбиспитим. Кэлин санаатахха күүһэ-уоҕа ситэ киирэ илик диэбитэ дуу, тэбиибэр эрэ түбэһиннэрэн охторор кыахтаахпын диэбитэ дуу, ону билигин да билбэппин.

         Егор Прокопьев күннээн тустар кэмигэр 70 кг оройуоҥҥа кими да тулуппата, Саха сиригэр да тулуһар киһи суоҕа. Саха бэртэрин иһигэр Николай Давыдовы хаста да охторбута үһү, Николай Амма бөҕөһө этэ. Хоту дойду бөҕөһүн Айаан Попову эмиэ охторор эбит, биир дойдулааҕа Степан Сон да сабырыттарара үһү, Владимир Андросов ити оҕутта, Владимир Николаев иккитэ тэҥнэспит, Уус-Алдан бэрдэ Семен Макеев, Чурапчы ааттааҕа Федор Эверстов, Степан Ефремов Дьөгуөр кэнниттэн миэстэ ылаллара, Выбор Быкалыров Дьөгүөр ордук этэ диэччи, Валерий Бырдакаров: "Дьөгүөр диэн мээнэ охтубат бөҕөс буоллаҕа, күүс, сүһүөх, албас барыта баар киһитэ этэ" диэччи. 1969 с. өрүс үрдүгэр икки аатырбыт бөҕөстөр Егор Прокопьев уонна Афанасий Мачахов тустубуттар, онно Дьөгүөр киһитин атаҕын хабылы тэбэн тустуу тохтообута. Афанасий Поликарпович: "Дьэ, ат тэбэрин курдук тэбэр киһи эбит, арааһа атаҕым хабылынна быһыылаах” — диэбитэ уос номоҕо буолан сылдьар, Мачахов да тирэхтээх киһи эбит, атаҕа тостуор дылы охтубатах.

         Дьөгүөр идэтинэн учуутал этэ, Бүлүү педучилищетын үөрэнэн бүтэрэн баран төрөөбүт оройуонугар элбэх сыл учууталлаабыт, ханна үлэлээбит сирин аайы оҕолорго тустууну үөрэппитэ, дьон-сэргэ убаастабылын ылбыт, сытыары-сымнаҕас киһи этэ, баяҥҥа үчүгэйдик оонньуура, куһу-хааһы сыыспат ааттаах ытааччы этэ дииллэр.