Саха Республикатын хапсаҕайдаһан тустууга маастара Рустам Прокопьев 1987 с. балаҕан ыйын 2 к. Боотулууга Прокопьевтар дьиэ кэргэннэригэр төрөөбүтэ. Аҕата Юрий Семенович Прокопьев төрүт Боотулуу, Оноҕоччут нэһилиэгин Дьаархан аҕатын ууһуттан төрүттээх, ийэтэ Саввинова Тамара Тимофеевна Оҥхой нэһилиэгиттэн төрүттээх. Рустам Боотулууга начальнай кылааһы бүтэрэн баран, убайын Генаны кытта Үөһээ Бүлүүтээҕи оҕо спортивнай оскуолатыгар үөрэнэ киирэн, көҥүл тустуунан дьарыктаммыта. 2004 с. Үөһээ Бүлүүтээҕи И. Барахов аатынан оскуоланы бүтэрэн баран, Чурапчытааҕы физкультура институтугар үөрэнэн тренер-преподаватель идэтин ылар.

Рустам спортка ситиһиилэрэ: 2009 с. В. Федотов бирииһигэр республиканскай турнирга I м, хапсаҕайдьыт Н.К. Докторов-Бычырдаан бирииһигэр республиканскай турнирга II м, Россия үс төгүллээх чемпиона, ССРС спордун бочуоттаах маастара П.Е. Алексеев аатынан республика чемпионатыгар III м, 2010 с. Илья Кондратьев бирииһигэр ыытыллар “Хаҥалас хапсаҕайа” турнирга I м, хапсаҕайга республика абсолютнай чемпиона, хапсаҕайга Василий Степанов-Буучугурас бирииһигэр I м, ССРС спордун маастара Владимир Андросов бирииһигэр I м, ССРС спордун маастара Иннокентий Халдеев бирииһигэр I м, Василий Румянцев бирииһигэр I м, бырааттыы тустууктар Ноговицыннар бириистэригэр I м, 2011 с. Сергей Ли-Фу бирииһигэр II м, Брызгаев-Бөҕө Тараҕай бирииһигэр III м,  А. Оконешников бирииһигэр II м, 2012 с. П.Е. Алексеев аатынан хапсаҕайга республика чемпионатыгар III м, Г.А. Попов бирииһигэр аналлаах хапсаҕайга республиканскай турнирга I м.

Рустам Прокопьев хапсаҕайга республика хас да төгүллээх кыайыылааҕа, улуустааҕы уонна республикатааҕы ыһыахтарга многоборье, хапсаҕай муҥутуур кыайыылааҕа, Бүлүүгэ ыытыллыбыт Манчаары Спартакиадатын, Өлүөхүмэҕэ ыытыллыбыт “Өбүгэ оонньууларын” кыттыылааҕа.

2012 с. төрөөбүт-үөскээбит Боотулуутун нэһилиэгэ 240 сыллаах юбилейнай ыһыаҕар хапсаҕай биллиилээх маастардарын охтортоон, ыһыах абсолютнай чемпионунан буолбута. Маны таһынан Чурапчыга ыытыллыбыт суруйааччы С.С. Яковлев-Эрилик Эристиин төрөөбүтэ 130 сылыгар аналлаах юбилейнай ыһыахха пятиборье көрүҥүгэр иккис миэстэлээх, Чурапчы улууһун Төлөй нэһилиэгэр ыытыллыбыт Президентскэй юбилейнай ыһыахха “Кудай Бахсы” күүстээхтэр күрэхтэрин кыайыылааҕа, бу ыһыах хапсаҕайга муҥутуур кыайыылааҕа.